Spurs leh United an inhnehtawk

Ningan i zan khan English Premier League khelh chhunzawm a ni a. Top 4 huang luah phak tuma inel Tottenham Hotspurs leh Manchester United te chu 2-2 in an inhnehtawk. Spurs leh United an inhnehtawk laiin pathumnaa awm mek Newcastle United chuan hnehna an chang ve thung a. Magpies hian champions league khelh phak an hnaih deuh deuh zel.
Tottenham chhanhimtu Son
Panganaa awm mek Tottenham hian an chung chiaha awm, an mikhual Manchester United lakah bul an tan tha lova, chawlhlawk hmain si hnih an phur hman. Chawlhlawk hmain si hnih phur mah se chawlhlawk hnu lamah huaisen takin an nawr let a. Hun tawp dawn hnaiha Son Heung-Min goal thun hmanga him hramin tlawm an pumpelh.
FA Cup final khel tur United hian an elpui lian Tottenham lakah bul an tan tha viau a. Inkhel tan atanga minute sarihna lekah Marcus Rashford siamsak atangin Jadon Sancho chuan hmahruaina goal a thun. Hma taka goal an thun vangin Mimualah inrintawkna sang zawk leh phurna sang zawk nen an inlann chhunzawm a, chawlhlawk hmain goal dang an thun belh leh.
Mualneitu Tottenham in na taka an nawr chungin United an him hram zel a, goal thun hmasa zawkah an tang leh ta nge nge. Chawlhlawk dawn hnaih minute 44-naah goal hmahruai siamchhuaktu Marcus Rashford chuan Bruno Fernandes siamsak atangin a pet goal a, an goal hnihna a thun. Chawlhlawk hmanin goal dang a luh belh tawh lova, United hian si hniha hmahruai chungin chawlhlawk an hmang.
Manager nei lova awm mek Tottenham in chawlhlawk an hmang tangkai a, second half-ah tha takin an kir a, an chetla a hmuhnawm ta hle. Minute 54-na lekah Pedro Porro chuan buai nuaih nuai karah tha zetin goal kilah a pet lut a, an si phurh a sut then. Second half tan tirh lamah goal an thun hian Spurs a fuih phur viau a, tho thang tha zawkin an mikhualte an nawr zui theih phah.
Goal thun a, an si phurh sut zawh ngei tumin Tottenham in United an nawr a, hun pangngai tawp nan minute 11 chiah a awm tawh tihah goal an thun a, an si phurh a sut zo. Fuh taka an khingpuite an nawr tlang hnuin minute 79-naah Harry Kane siamsak tha tak chu Son Heung-Min chuan fuh takin a pet goal a, an si phurh a sut zo.
An inhnehtawk thar leh hnuin inkhel a hmuhnawm sauh a, chak tumin an innawr tawn nasa hle. Chak mamawh viau mah se team hnihten goal an thun belh thei lo ve ve a, 2-2 a inhnehtawkin, point khat ve ve an hmu ta a ni.
Tottenham lakah uiawm takin chak zo lo mah se Manchester United hian palina an luah chhunzawm a. An chungchiaha awm Newcastle Unites nen an inkarah point hnih chauh a tla zep a, Newcastle ai hian vawi khata an khelh tlem zawk vangin United hian pathumna ni chunga season khar theihna hun tha tak an nei. An mualah an chak zawh loh vangin Tottenham in champions league khelh phak an beiseina a chuai ta viau thung. Spurs hi panganaah awm chhunzawm mah se an chungchiaha awm United nen an inkarah point ruk a tla zep mek a. Red Devils ai hian vawi hnih ngawtin an khel tawm zawk nghe nghe.
Newcastle tan zan tha
Ninga zana inkhel dangah pathumnaa awm mek Newcastle United chuan Goodison Park an khingpui Everton chu 4-1 in an hneh a, pathumnaah an insawh nghet. An khingpui Everton an hneh bakah top 4 huang luah phak tuma an elpui lian Manchester United leh Tottenham te an inhnehtawk vangin Newcastle tan ninga zan kha zan duhawm tak a ni.
Goodison Park-a lenglut Newcastle United tan hian Callum Wilson chuan minute 28-naah hmahruaina goal a thun a. Hun rei tak chhung si khata hma an hruai hnuin minute 72-naah Joelinton chuan an goal hnihna a thun a. Goal hmahruai thuntu Wilson-a’n minute 75-naa an goal thumna a thun hnuin minute 80-naah Dwight McNeil chuan Everton tan goal thunin an si phurh a sut then ngan a. McNeil goal thun atanga minute khat hnu lekah Jacob Murphy chuan Magpies goal lina a thun zui leh zat thung.