Inkhawm tam ti lo, tihtlem tul ti lo

Inkhawm tihtlem chungchangah ngaihdan a inang lo a, tam ti leh tam ti lo an awm ang; Mizoram Presbyterian Kohhranah hemi chungchang hi tun hnaiah thu pawimawh a tling a, mahse a chaitu kohhran member-te hian inkhawm hi tam an lo ti lo niin a lang.
Synod Research & Evaluation Wing te’n Presbyterian kohhran member-te ngaihdan an zirchiannaah 39.4% te’n inkhawm hi tam an ti a, 52.3% te’n tam an ti lo.
Inkhawm a tam titute zingah pawh 34% chuan inkhawm tihtlem kher tul an ti lo.
Inkhawm a tam ti lo leh a tam tite zinga tihtlem tul ti lote leh ngaihdan nei lote zinga 68% te’n inkhawm hi tihtlem tul an ti lo.
He zirchiannaah hian Slovin’s formula an hmang a, Mizoram chhunga Pastor Bial tin dap chhuakin mi 10,258 te’n questionnaire an chhang a ni. An formula hman te, a sample size (chhangtu zat) leh a dap chhuah zatte enin he zirchianna hi Presbyterian Kohhran member-te ngaihdan phochhuak phaah an ngai.
Inkhawm tihtlem a nih dawn rau rau chuan Chawlhni chhun inkhawm paih ni se ti an tam ber a (32%), a dawttu chu Inrinni (14%) zan a ni.
Questionnaire chhangtute ngaihdanah hian hun awl an neih dan a pawimawh tih a lang a, hun awl ngah an intih poh leh kohhran inkhawm zat tam an ti lo tial tial. Chutih rual chuan hun awl neih belh ta se, mut hahchawlh nana hman duh 23% an awm.
He zirchiannaah hian inkhawm ngaih pawimawh hlawh ber chu Sunday School a ni a, Chawlhni zan inkhawmin a dawt a, Nilai zan inkhawmin a dawt leh.
Hmeichhia aiin mipain inkhawm tam an ti niin a lang; mipa 42.6%-in inkhawm hi tam an ti a, hmeichhia 33.3%-in inkhawm hi tam an ti.
Aizawl khawpui leh khaw dang khaikhinin, Aizawla chengteah inkhawm tam ti an tam zawk a, Aizawla cheng 49% chuan inkhawm hi tam an ti a, 43%-in tam an ti lo. Aizawl pawnah chuan inkhawm tam ti hi 36% an ni a, 56%-in tam an ti lo.
He zirchiannaa questionnaire chhangtu 65% chu mipa an ni a, 32% chu hmeichhia an ni. Chhanna pe lo mi 279 an awm. Chhangtute hi chawhrualin kum 48 vel an ni a, chhangtute zinga 27% chu kar khata vawi 5 tal inkhawm thin, 21% chu vawi ruk tal inkhawm thin an ni.
He zirchianna report hi tun hnaia neih Synod Inkhawmpuiah khan an pharh a, palaite’n an thlir a ni. September thlaa Presbytery Inkhawmpuiah khan palaite’n an lo sawiho tawh bawk a, a tam zawkin inkhawm tihtlem hi tul an lo ti lo tawh