Inlaichinna tibuaitu zawk i ni em?

Inlaichinna tibuaitu zawk i ni em?
Tun tumah hian relationship lama mithiam ten kan kawppui te nena kan inlaichinna a boruak tha lo thlentu zawk kan ni tih inhriat theih dan a awm niin an sawi a, tun tuma kan rawn tarlan te hi uluk takin lo chhiar la, insiamthat i ngaihna lai a awm a nih chuan hreh loin, rang takin i insiamtha nghal dawn nia.
1. I kawppui kutah tih tur tul zawng zawng i dah thin em? Chutiang chu i ti thin a nih chuan in inlaichinna tibuaitu i ni tihna a ni thei. Mawhphurhna insemzai thiam te a pawimawh tih hre thar leh ang che. Engkima a bul tantu leh chet la hmasatu-ah i kawppui chu a tang thin a nih chuan, i insiam that a ngai. In chhung chet, sum dehchhuah, bungraw lei leh thildangah a hmalatu zawkah i tan tir tlat a, bedroom thleng thlengin a chet la hmasatu a nih zel a tul chuan, chu chuan boruak tha lo a siam thuai thei dawn a ni. Hei vang hian kawppui te nen mawhphurhna insemzai thiam a pawimawh hle a ni.
2. Nangmah i nihnaah khan i lawm tawk lo em? Inlaichinna nghet, tlo leh tha nei tur chuan mahni kan pawimawh hmasa a, kan nihnaah kan lawm thiam hmasak a tul. Mahni nihnaah pawh kan hlim loh chuan engtin nge midang kan tihhlim theih ang! I nun dan emaw, i khawsak dan emawah khan i hlim lo va, nuam lo tihna i nei ru a nih chuan chu chuan i kawppui nena in inlaichinna a nghawng ngei ngei ang. I nunah i lawm tawk lo va, i lungawi lo a nih chuan, chu chuan a tha lo zawngin i kawppui nena in inlaichinna a nghawng dawn a, chuvangin a êng zawnga thil thlir thiam te a pawimawh hle a ni.
3. I kawppui chu tihtauh khumin biak duh loh i ching em? Kawppui te nen inhauh chang a awm thin a, inhnial deuh bap bap chang pawh a awm ve lo thei lo, chu chu thil pangngai a ni. Mahse, chutiang boruak in neih zawh hnuah inbiak duh loh a in tihtauh khum chin tlat te, engmah sawi si lo va tûm bur reng te hi inlaichinna tibuai zualtu mai a ni zawk.
4. I kawppui chu i ring chhe thin em? Kan kawppui te rin chhiat tlat hi thil awm ve thei tak a ni. Kan inhau a, kan inhnial a, anni pawhin boruak tha neih leh thuai kha an chak ve zawk a, mahse, anni chu kan ring chhe tlat a, min tihnat chak ve hrim hrim angah te kan ngai a. Kan suangtuahna a vak kual a, kan ngaihtuahna a kal chhe tawlh tawlh thin. I rilru tihnat hrim hrim a chak vang a ni hauh lo, a fimkhur tawk loh vang emaw, i beisei dan a hriatthiam loh vang mai mai te a lo ni zawk thin.
5. I thiam lohna leh dik lohna pawm i harsat em? Chutiang mi i nih chuan i kawppui nena in inkara boruak tha lo siam fotu i ni ngei ang. In inlaichinna chu nghet tura i duh a nih chuan i tihsual leh dik lohna te pawm ngamin, kawppui te mawhpuh mai lo va, kan dik lohna leh tihsualah mahniin a mawh lak ngam ve tur a ni. Kawppui te mawhpuh ching ho chuan an kawppui te avanga buaiah an inngai thin a, mahni tihsual leh dik lohna hmu thiam lo leh pawm thei lo te hian an kawppui te nena an inlaichinna an tichhe thuai thin. Tu nge thiam lo zawk tih lam ngaihtuah ai chuan, engtin nge kan chinfel theih ang ti zawnga ngaihtuah hman thiam a pawimawh hle.
6. Inhnial leh inhauh changin thil dangah i pakai kual vak thin em? Kan inhnial a, kan inhau a, mahse, a topic-ah kan cheng reng thei lo, thildang a kangkai a, hmanah pawh i chuti lo, i khati lo, tiin thil dang dangah kan pakai zel a, hei hi inlaichinna tichhetu pakhat a ni. A tira kan inhnialna leh inhauhna piah lamah kan pakai a, a tira kan subject ni hauh loah kan lut ta daih a, a chhe tinreng kan phawrh ta thin. Hetiang hi chin loh hram tur a ni. Kan inhniala kan inhau a nih pawhin a chhan kha hriatchian a pawimawh.
7. I kawppui nena in inlaichinna tlakhniam chhanah khan mawhphur ve lo anga i inngai a nih chuan, chu chu i tihsual a ni- nangmah vang ngei kha a ni e. Tumah hi inlaichinnaah sawiselbo an awm thei bik lo. I kawppui nena in inkar a tha vak lo a nih chuan nangmah vang a ni tih hriain a siamthat hna thawk vat vat zawk ang che. Inlaichinna a lo chhiatin, “Ani hian a zir lo a ni,” tih te, “A thiam loh vek a ni,” tih te kan ching a, a tu emaw zawk zir loh ni lovin an pahniha zir loh leh an pahniha thiam loh a ni zawk. Inlaichinna tha nei turin mi pahnih ten chet an lak a ngai a, kan inlaichinna a chhiat pawhin kan pahnih a mawhphurhna tho a ni.