Inneih duh lo i ngaizawng reng dawn em ni?

Inngaihzawnna boruak hi beisei loh lam daih a kal chang te pawh a thleng ve thei. Tu emaw nen in inngaizawng a, in inzui rei ve ta viau a, engkim a tha vekin i hria a, inpahnih a hmalam hun tur te i ngaihtuah a, engtikah nge kan inneih ang tih thlengin i ngaihtuah kai tawh, mahse, i ngaihzawng chuan inneih lam chu a la ngaihtuah loh thu leh, nupui/pasal neih lam chu a rilruah a la awm loh thuin a chhang ta tlat mai che. Chutiang boruak chu tawng ta la engtin nge i tih ang. Thinrima inhauh leh inhnial pui nghal mai lova, engtin emaw tih dan tur tha ni a relationship lama mithiam te sawi kan rawn tarlang e.
1. A hmasa berin eng vangin nge inneih chu a duh loh tih kha hriatchian tum phawt rawh. A hun hmasa lamah na taka inthenna a lo tawk tawh em tih te, a rilru na kha tuam dam a la tum mek a ni zawk em tih te pawh hriat tum rawh. I ngaihzawng chuan innei kher lo a inngaihzawn chu inhlimna tur zawk niin a ngai tak tak em? A nih loh leh, a duh ve satliah ringawt che a, dam chhung kawppui atan a duh tak tak lo che tihna a ni zawk ang em? Engvanga inneih chu duh lo nge a nih tih hriatchhuah hmasak hi a pawimawh a, chu chuan hmalak dan tur a hriattir thei dawn che a ni.
2. Thutlukna siam hmain inngaihzawnnaa i kawppui lak atanga i mamawh te i hriatchian a pawimawh. I ngaihzawng chu eng vanga neih duh nge i nih ang, eng vanga neih theih inring nge i nih? Tisa in itna leh induhna ringawt nge ni a inhmangaihna tak tak? I ngaihzawng chu nupui/pasal tha tak a nih i ring em? Hmangaihna lam chu dahtha lawk ila, innei ta ula sum leh pai lamah in inenkawl thei ang em? A pawimawh ber pakhat chu, inneih chu nangmahah eng nge a chian dan, i duh takzet em? tih kha inngaihtuah bawk ang che.
3. I ngaihzawng chuan hriatchian lehzual che a la duh vang pawh a ni ve thei a, inneih sawikai tak tak hmaa inhrechiang lehzual turin hun a la mamawh te pawh a ni thei. I tan buaina a awm loh a, nupui/pasal neih thuai thuai ngai i nih lemloh bawk siam, han nghak deuh la, engtin nge boruak a inher tih a hriat thuai tho ang.
4. I ngaihzawng chuan in inngaihzawnnaah chuan eng emaw beisei a nei a, chu chu a hmu lo a ni maithei, chutiang chu inboruak a nih chuan kalsan vat la a tha zawk ang. Hmalam hun atana engmah beisei tur awm lo tana i hun leh nun khawhral mai mai kha a uihawm mai mai e.
5. Heng zawng zawng hi thlirna tlang hrang hrang atangin i thlir tawh a nih chuan i ngaihzawng chu sawipui tawh rawh le. Engkim tlang takin, i rilru sukthlek leh in dinhmun te. Tichuan, nangpawhin uluk takin a sawi tur te lo ngaithla ve la, chumi hnuah thutlukna insiam thei ang.
6. I ngaihzawng chuan i ngaihdan a tawmpui lo che a ni thei, inngaihzawnna boruakah mamawh dang a nei pawh a ni thei, tlang taka a hrilh che a nih chuan zah sak ang che. In tana tha tur inngaihtuah ve ve a, in inbum lo. Beisei tur awm lo a beisei tir lo law law che kha a tha zawk e.
7. Mi tam zawk hi chuan kan inngaihzawnnaah boruak a that ve leh mai rinna te kan nei a, kan inkar harsatna awm te pawh a reh leh mai kan ring a, chutiang beiseina nen chuan kan inkawp tang tang thin. Mahse, hringnun hi lasi thawnthu ang emaw, romantic film lungkuai tak emaw ang a ni kher lo tih hriat tur a ni. In pahnih hmalam hun thui tak i thlir theih loh hunah i la hlim reng ang em? Rei tak inzui hnua inkalsan a tul hunah i rilru natna te engtin nge i thawi dam ang? Tuna inthen kha a harsa i ti a, mahse, suangtuahna rama chen reng ai chuan a tha zawk lo’ng maw? I hmathlir ang thlir ve ngaihzawng zawng la, chu chuan i khawvel a tihlim zawk ang. I nun a ni a, i duh zawngin khalh kal rawh le.