Inruahman lawk aia hmain Iran bei, indona a nasa zel

Inruahman lawk aia hmain Iran bei, indona a nasa zel
US-in Iran a beih chu a hun hmaa tih niin Middle East-a American commander lawk berin a sawi a, hetih lai hian Israel leh US-in an ram an beih chhan let nan Iran chuan Gulf chhehvelah beihpui a thlak ve mek bawk.
Ni nga chhung indona hian khawvel sumdawnna vir vel a tibuai chhunzawm zel a, airline leh tourism industry-te chu thlawhna 20,000 chuang zin tur thulh an awm tawh avangin an buai hle a, sorkar hrang hrangten Middle East atanga an mi tangkhangte chu hruai haw tumin an hma an la mek zel bawk.
Israel sipaite chuan Nilaini khaw var hma khan Iran missile kahchhuahna hmun, air defence system leh hmunhma dangte chu tha thara an beih leh thu sawi.
Israel-ah pawh Nilaini tuk khan Iranian-ten missile-a an kah avangin air raid siren a ri nasa a, missile-te chu lo dang thei hlawm mah se a puak ri nasa tak chuan inte a tinghing nasa hle niin a hmutute chuan an sawi.
Central Command hotu, Middle East-a US sipaite kaihruaitu, U.S. Admiral Brad Cooper-a chuan Iran laka beihpui an thlak tirh lam darkar 24 chu kum 2003-a Iraq War bul an tanna, ‘Shock and Awe’ campaign-a a tir darkar 24 aiin a let hnih velin an che na zawk tih a sawi.
Thawhlehni tlai khan video-a thu a tihchhuahah Cooper-a chuan, “Iran-in keimahni leh kan thawhpuite an rawn beih theihna chu a tlahniam tih kan hmu a, kan chakna erawh a insiam chho zel a ni,” a ti a. “Ka beihpui thlakna hi kan inruahman aiin kan tihtha zawk a ni,” a ti.
Cooper-a chuan Iran air defense chu nasa takin a chhe tawh tih sawiin, an navy pawh lawng 17 an tihpilsak hnuah hnuah che theitur an an nei tawh lo niin a sawi a. Iran-ah hian hmun 2,000 chuang an kah thu a sawi bawk.
US sipai 50,000 vel beihpui thlaknaah hian an tel a, ‘theihna tam zawk’ a la thlen belh dawn tih a sawi bawk.
US sipaite chuan Thawhlehni khan indonaa thi hmasa ber American sipai pali an finfiah a, President Donald Trump-a sorkar chuan tam zawk pawh an la thih theih thu sawiin lei lam sipai hman pawh a hnial lo.
Israel indona ruahmanna hrechiangtu pakhat chuan Reuters hnenah beihpui thlak hi chawlhkar hnih awh tura ruahman a nih thu leh beisei aia rang zawkin an tum an fuh thu a sawi a. Iranian hruaitu thah an tumnaa an hlawhtlinh hma a, Inrinnia bul an tana an tihhlum zingah Supreme Leader Ayatollah Ali Khamenei-a pawh a tel nghal a ni.
Trump-a chuan Thawhtanni khan US-in a ruahman dan chuan chawlhkar li atanga nga chhung awh tur a nih thu a lo sawi tawh thung.
Indona avanga thi hi Iran-ah chuan Thawhleh thleng khan mi 787 an tling tawh nia sawi a ni a, hetah hian a tan nia hmeichhe naupang 165 thite pawh an tel a, hei hi civil mite hmun kah nia sawi zinga thi an tam berna a ni.
Iranian-te hian khawpui hrang hrang an tlanchhiat avangin khawpui ber, Tehran pawhg a reh hle.
Israel chuan Nilaini khan Iran thlawptu Hezbollah chu an thenawm, Lebanon-ah a bei chhunzawm zel bawk a, helho hian kum 37 chhung Iran hruaitu, kum 86 mi, Khamenei-a thihna phuba lak nan Israel hi an kap hmasa.
Israeli sipaite chuan Nilaini khan Lebanon khawthlang lama khaw 16-te chu inthiar chhuak tura tihna thupek an tichhuak a. Hezbollah fighter, hmunhma leh an ralthuam chhekna bula awm an awm chuan an nunnain a tuar dawn niin an sawi.
Israel-in Lebanon khawchhak lam khawpui, Baalbek-a chenna in chhawng lia sang a kahnaah mi eng emaw zat an thi niin sorkar news agency NNA chuan Nilaini tuk khan a puang bawk.