Inter hmachhawn tura tlang Viola

Inter hmachhawn tura tlang Viola
Ningani zan Italian Coppa Italia semi-final second leg-ah Fiorentina chuan goal awm loin an mikhual Cremonese inhnehtawkpui bawk mah se first leg-a sihnih faia an lo chak tawh hmangin final an lut a, May ni 24 khian Rome khawpuia Stadio Olimpico-ah Inter Milan nen Coppa Italia champion nih an inchuh ang.
Chak mamawhna sang tak nei tawh lo Fiorentina-in an kawtkaia draw result neih kha a tawk tih hre chungin mikhual team danbeh kha an thupui a ni deuh ber a, goal chance han tih tur pawh hmuh tur a vang a, inkhel hmuhnawm tia sawi theih pawh a ni lo.
He tournament-a vawiruk cham-pion tawh Fiorentina tan hun tawp dawnah Riccardo Sottil chuan chakna goal a thun tep a, mahse, corner atanga ball chhuak chu goal-ah a chantir zo lo.
Tuscan bial club Viola hian kum 2001 hnu lamah trophy lian lak an nei leh ta miah lo a, Inter Milan lakah title an beisei ang.
Inter Milan 1-0 Juventus
(2-1 on aggregate)
Nilaini khan final lut tur hmasa zawk inchingfelin, Turin khaw first leg-a sikhat ve ve thuna inhnehtawk tawh Inter leh Juve inkhelah sikhat faiin San Siro luahtute an chak a, khelh hnih belh-khawma 2-1 hnehna nen Internazionale zawkin Italian Coppa Italia final an lo lut fel tawh a ni.
Coppa Italia semi-final second leg match-a team pahnih thenhrangtu leh FC Inter Milan tlangna goal pawimawh kha first half minute 15-naleka Federico Dimarco tihluh niin, defending champion Inter-in an trophy kawl lai humhim turin hun remchang an nei chhunzawm zel.
San Siro-a goal awmchhun khungtu Dimarco kha left wing-back niin, Nicolo Barella pinpoint through ball chhawr-tangkaiin chakna leh final luhna goal awmchhun a khung a, tarlan tawh angin, Simone Inzaghi team Inter hian final-ah Fiorentina an hmachhawn zui dawn ta a ni.
Turin khaw first leg-ah khan boruak duhawm lo a thleng nual a, minute 95 penalty hmanga Inter tlawm tur chhantu Belgian mihang striker Romelu Lukaku kha Juventus supporter-te’n khelmuala a awm chhungin a vunrawng vangin an aunawmnah a, Lukaku lungawi lo chuan home supporter rual ensel zawngin a goal thun a lawm zui ve ngat a, yellow card dang hmuhbelhin hnawhchhuah a ni a, match khat hremna a ken tel laiin Italian football thuneitute’n racism doletna hmanrua atan a chunga hremna an hlip a, Nilaini zanah khelmual lut thei ni mah se Inzaghi chuan bench lamah a hnutchhuah phawt.
Belgium striker hi minute 68-ah luhtir niin, mualneitu team-in first half-a an goal khat neih humhim an duhtawk titih tawh avangin goal bawh lam an tina lutuk ta lo a, nuamsaa Juventus dangbet theiin, Lukaku pawh a langsar zui ta vak lo.
Chelsea loanee diriamtu Juve fans 100 chuang pawh police lamin chhinchhiahin, inkhel en tura stadium luh ve an phalsak lo a, he hremna hian engtia rei nge a awh dawn tih erawh puanzar a la ni lo thung.