Inter leh City in semi-final an lut

April 19, Nilai zan khan champions league quarter-final khelh zawh a ni a. Italian Serie A club lian Inter Milan leh Premier League champion Manchester City ten Real Madrid leh AC Milan te hnung zuiin semi-final an lut.
Inter Milan an tlang
Nilai zana UEFA Champions League quarter-final thawh hnihnaah Italian club lian Inter Milan leh an mikhual Benfica te chu 3-3 in an inhnehtawk a. Si belhkhawmah 5-3 a hnehna changin Inter Milan in semi-final an lut. Semi-final-ah Milan derby hmuh tur a awm dawn a. Inter hian Serie A champion AC Milan an hmachhawn zui leh ang.
Inter Milan hi Benfica khelmualah Estádio da Luz-ah si hnih faia chak tawh an nih vangin semi-final lut turin an dinhmun a tha zawk a. An mualah goal thun hmasa zawk ni zel chungin chak zo lo mah se, rinlawk ang ngeiin semi-final an lut a. Final lut a, Istanbul-ah zin ngei tumin tan an khawh zui ang.
San Siro-a quarter-final thawh hnihnaah hian Inter Milan in bul an tan tha a, goal pawh an thun har lo. Fuh taka an mikhualte an nawr tlang hnuin Nicolò Barella chuan box chhunga fing zeta ball a lak kual hnuin far post ah a kangin a pet kual lut a, minute 14-naah hmahruaina goal a thun. Si hnih faia hmahruai tawh Inter Milan in goal an thun hmasak leh vangin semi-final luh tuma inelna a tawp fel ang hiala ngaih a ni a. Inter Milan chuan semi-final an lut chiang tluka ngaih a ni.
Si thum fai ngawta an hnufual hnuin Benfica in goal thunin an si phurh an sut then. Inter Milan tana Lautaro Martínez tauh luh hnawl a nih hnuin minute 38-naah Fredrik Aursnes chuan chiang zetin a tauh goal a, an si phurh a sut then. Aursnes goal turu a luh hnu hian goal dang luh belh lovin first half a tawp a, 1-1 in an inhnehthawk chungin chawlhlawk an hmang phawt.
Chawlhlawk hnu lamah Benfica an khel tha chhunzawm a, second half tir lamah an khingpuite an nawr bet a, goal thun tumin hlauhawm an siam fo. Benfica in hun tha nei zawn bawk mah se Inter Milan chu goal thun hmasa zawkah an tang leh ta zawk. Fuh zeta an khingpuite an nawr tlang hnuin Lautaro Martínez chuan Dimarco hnen atanga ball a hmuh tha tak chu chiang zetin a pet goal a, an goal hnihna a thun.
4-1 zeta an hnufual vangin Benfica an hnual a, Inter an phur ve thung. Tha tho taka an mikhual nawr zuitu Inter hian goal an thun belh leh ta nge nge. Minute 78-naah Joaquín Correa chuan mawi zetin a pet kual lut a, an goal thumna a thun. An mualah 3-1 a hma an hruai bakah si belh khawmah 5-1 ngawta an chungnung tawh zawk vangin Inter Milan dinhmun a tha viau tawh a. Inter player Simone Inzaghi chuan an player tha a hahdamtir a, player khel tlem zawk a luhtir. An dinhmun a that tawh em vangin Serie A club lian hi an inthlah dah hret a, an inthlahdah sual teuh ther ther hle a, hun tawp dawnah goal hnih ngawt an chhuah.
Thlana phum tluk thawthanga dinhmun chhe tawh Benfica hian huaisen takin tan an khawh zui a, hun tawp dawn hnaihah fak phuin an inlan, Minute 86-naah Grimaldo freekick pet tha tak chu António Silva chuan vanneihthlak ang reng takin a tauh goal a, an si phurh a sut then. Silva goal thun hian Portuguesse team a fuih phur leh zual a, hun tawp dawn hnaihah goal dang thun belh leh. Minute 90+5-ah Petar Musa chuan leihrulah rang zetin a pet goal a, San Siro-a an si phurh a sut zo. Inter muala an si phurh sut zo mah se goal hnih thun belh mamawh chu Benfica hian an tihlawhtling zo lova, si belhkhawmah 5-3 a tlawmin an tla a. UCL atangin an puanthuah an tel zui ta a ni.
Inter Milan in semi-final an luh leh tak vang hian Italian club in Champions League final an khel ngei dawn tih a chiang nghal a. Semi-final-ah Inter derby hmuh tur a awm dawn a. AC Milan leh Inter Milan ten final luh an inchuh dawn. Milan khaw club lian pahnihte hi kum 2005 hnu lamah champions league-a an intawn lehna hmasak ber a ni. Inter Milan forward Lautaro Martinez chuan AC Milan nen semi-final a an intum tur chu thil special tak a nih thu a sawi a. Milan nen an inkhel tur chu Milan derby ni satliah lovin champions league semi-final a ni tih an hriat chian thu a sawi tel bawk.
Kum 1980-81 hnu lamah Italian manager zinga champions league semi-final a Inter Milan hruai thleng leh hmasa ber Simone Inzaghi chuan semi-final-a an khingpui tur AC Milan chu hlauhna an neih loh thu a sawi a. Semi-final luh phu team tha an nih thu a sawi tel bawk.
Bayern dan theih loh City : Etihad Stadium-ah si thum fai ngawta hnehna chang tawh Manchester City chu Allianz Arena-ah an lenglut a. Champion tura rinkai City hian Haaland goal thun chakpui zo bik lo mah se, si belhkhawmah 4-1 a hnehna changin semi-final an lut. German champion Bayern in EPL champion City dan tum viau mahse an dang zo lo.
Manager thar Thomas Tuchel hnuaiah beisei anga khel tha hleithei lo Bayern Munich hian inlehthal na lian thlentir theih beiseiin Manchester City an mikhual a, an mualah khel chhe lem lo mah se a tawp an khar fuh theih loh an tuar a, an mualah goal khat chauh thunin, tlawm an pumpelh thei hram chauh.
Allianz Arena-a inkhel hmuhnawm takah hian chawlhlawk hmain goal lut a awm thei lo phawt a. UCL Top-scorer ni mek Erling Haaland chuan minute 57-naah Kevin de Buryne siamsak atangin hmahruaina goal a thun. Haaland hian season kal meka UCL-ah goal 12 a thun tling chiah a, top-scorer a ni fal leh zual. Haaland hian amah hnaih bertu Mohamed Salah aiin goal liin a thun tam zawk mek a. Salah hian goal a thun belh tawh dawn rih loh laiin Haaland erawh hi chuan goal thun belh theihna hun tha a la neih belh dawn thung. Semi-final khel phak zingah City hmachhawn tur Real Madrid player Vinicius Junior chuan goal ruk a thun tawh a, ani hi Haaland hnaih bertu a ni.
Manchester City in si li fai ngawta hma an hruai tawh vangin semi-final lut tur zawk a chiang tawk viau tawh a. An mualpho lutuk tur khuh mawi nan Bayern in hun tawp dawn hnaihah goal khat an thun ve hram. Penalty an hlawhchhuah chu minute 87-naah Joshua Kimmich chuan a pet goal a, an si phurh a sut then. Kimmich goal thun hnu hian goal dang a luh belh tawh lova, Manchester City chuan 4-1 hnehna changin semi-final an lut a. Season liam taah semi-final-a an hneh loh Real Madrid an hmachhawn zui leh ang.
City leh AC Milan ringtu Wenger
Nilai zanah UCL quarter-final khelh zawh a nih a, semi-final lut a hriat kim hnuin Arsenal manager hlui Asene Wenger chuan semi-final result a rinlawk na a sawichhuak a.Wenger hian final-ah Manchester City leh AC Milan an intum a ring.
Wenger hian IN Sports hnenah final-ah Manchester City leh AC Milan an intum a rinthu a sawi hnuin Real Madrid a fak a. “Real Madrid chu Real Madrid an ni nge nge a. Eng team pawh hmachhawn se goal an thun thei thin. UCL hi an ta neih hlur mai bawk a, hneh an harsa ang. Mahse, Real Madrid hneh thei tur ber chu Manchester City hi an ni,” a ti.
Season liam ta semi-final-a an inkhelh tumin City hian Real Madrid an hneh ngei dawn niin a lang hman a. Santiago Bernabeu atangin Real tantute pawh an chhuak thawl nasa viau hman tawh. Hun pek belha goal hnih an thun hmangin City laka an si phurh an sut zo lova, extratime-ah Benzema goal hmangin Real Madrid an chak a, final-ah Liverpool hnehinan champion zui ta hial bawk. Khatiang inlehthalna kha thleng thei ni bawk mah se Wenger chuan City hun ni ve tawhah a ngai thung.