International match 152 a khelh chhungin Remsiami’n eng nge a tih loh?

International match 152 a khel tawh a, khawvel puma hmeichhia kum 23 hnuai lamte zinga hockey thiam berah pawh an thlang tawh. Match 152 a khelh chhung hian tih miah loh a nei.
Remsiami hming hi Zoram chauh ni lovin hockey khawvelin a hria. Tun hnaiah Women’s Asian Champions Trophy final-ah India-in China an hneh a, hei hi senior level-a Remsiami match 152-na a ni. Vawi 152 a khelh chhung hian Bible vawi riat a chhiar chhuak a, lehkhabu dang engemaw zat a chhiar. Lehkha a zir char char a, Olympic-a tel tur thlannaa a tel lai pawhin BA a exam. A nu leh pa thu a zawm tha a, mi invawng, mahni inthunun thei mi a ni. Mahse tih miah loh a nei.
Lalremsiami Hmar Zote-in international match heti zat a khelh chhunga a tih miah loh chu- sakhaw dangte pathian biaknaa kal a ni.
India team-ah sakhaw hrang hrang betu an awm a, Kristian ni lo sakhaw dang hmuna kal tur an tih chang a awm; kal vek tur an tih thin bakah serh leh sang atana an hman eitur te pawh ei turin an inti thin. Remsiami chuan chutiang a ti ngai lo.
“A chang chuan kan hotute leh teammate te’n mak an ti thin a, ‘arrogant’ min ti thei tawp! Keimah pawhin chaltlai min ti ang tih hlauh chang ka nei. Mahse ka duh ngai lo,” a ti.
“Ti ve turin min ti a, mahse ‘Kei chuan Lal Isua ka ring a… pawnah ka lo nghak ang che u,’ ka ti thin,” a ti a, chhang an lo pek pawhin a ei duh ngai lo a, a thiante’n ei tura an tih pawhin a duh ngai lo tih a sawi.
“Ei ve turin min ti a, pathian chu a inang vek alawm tiin a chhunga lut ve tur pawhin min ti thin a, mahse ka duh ngai lo,” a ti.
“Pathian ka zahpui ngai lo kei chu,” tiin Pathian a zahpui ngai loh thu a sawi a, “Ringtu kan nih chuan eng vangin nge Pathian kan zahpui ang? Ka Pathian hi ka zahpui ngai lo kei chu. Hetiang dinhmun ka thlen theih chhan hi Pathian a ni,” a ti.
Ni tin nunah Pathian dah pawimawh a tul thu a sawi a, “Pawisa a pawimawh a, thil pawimawh dang pawh a awm a. Mahse Pathian a pawimawh ber. Ka ngaihdan chuan Pathian tel lo chuan pawisa leh thil dang hi chu engmah lo mai a ni,” a ti.
Remsiami hian social media a khawih meuh lo, account te chu a nei ve a, mahse “Khawih nasa ka inti lo,” a ti.
“Social media hi ka ti ve a, ka khawih chhan ber hi chu hockey a nia, hockey tihlar nan hian ka ti berin ka hria,” Remsiami chuan a ti.