Inthlan chanchin ngaihnawm

Inthlan a zo a, party mite leh politics ngaihvente chuan
chang dang an la kan thei lo. An thlir let a, chanchin ngaihnawm tak tak te pawh sawi tur an hria.
Zawlpui-ah chuan MNF hruaitu, an khaw VC president-in Congress party campaign office a hawng!
Ani hi rin ang ngeiin Congress-ah a lut zui a, mahse vote a lo nei lo! Electoral roll-ah a hming a lo chuang lo a, hei hi inthlan dawn hnaiha an hriat chawp a ni. Roll hmasaah chuan a awm a, VC inthlanah te pawh ding thei a ni. Hetia roll-a a lo awm lo hi, tihsual palh a ni tih thu dawn a ni.
Roll siam lai hian draft roll an tlangzarh thin a, siamthatna hun te pawh an hawng thin. Mahse thun thar te, hmun danga insawn te, pasal neih vanga veng danga awm te, chutiang a nih loh chuan vote nei sate chuan an awm leh awm loh an en ngai lem lovah ngaih a ni. Zawlpui VC president pawh hian mi dang ang bawkin a hming a awm em tih hi a lo en kher lo a nih hmel.
Mission Vengthlangah pawh mi thenkhat chu an veng-ah vote nei lovin, Khatla South-ah vote an nei. Hei hi vote thlak dawnah an hre chawp! Bial khat an ni hlauh zawk a, mahni vengah vote an thlak lo na a, mahni bialah chuan vote hi an thlak tho.
Election department lam chuan hei hi thil kal sual palh liau liau a ni tih an sawi.
Candidate-te an thawkrim bawk a, hmel en pawha tla deuh kuang te pawh an awm. A bikin zin kual a ngaihna biala dingte an hah a nih hmel.
Candidate-te zingah zang ta sawt an awm nual a, kg 2-a zang ta te, chu aia tam deuhva zang te pawh an awm.
Candidate-te’n zan mu hman lo deuh thaw khawpa an beih laiin candidate pakhat chu a tang lo khawp mai a, a agent pawh amah vote lo turin a hrilh!
Ani hian a dinna district election officer hnenah inthlan hma ni khan EVM-ah a hming zawna hmehna awm chu hmeh theih lohva siam dan a awm em tih a zawt. Bawrhsap hian a theih loh thuin a lo chhang a, candidate pawh chuan a pawm ve leh ta a ni tih thu dawn a ni.