Zohnahthlakte rorelna pakhat hnuaia awmtir hi MNF thil tum – Zoramthanga

MNF chuan Zohnahthlakte rorelna pakhat hnuaia awm tir a tum tih MNF president Zoramthanga chuan a sawi.
Zirtawpnia Mizo Hnam Runa inkhawmah Zoramthanga chuan MNF Constitution-ah Mizo hnahthlak zawng zawng rorelna khat hnuaia awmtir chu a thiltum a ni, tiin, a tirah chuan Manipur, Tripura leh Assam-a chengte chauh huamin, foreign-a chengte erawh a huam rih loa, India-a awmte chu chhanchhuah theih an ni a, hei hi MNF thiltum hmasa a ni, tiin a sawi.
Kum 1965-ah Manipur Zohnathlakte unaute nen inkhaikhawmna tur an buaipui a. Kum 1966 ram buai hnuah pawh Manipur-ah operation neiin tam tak underground-ah an lut a, tam tak an martar a, thisena baptis an ni, tiin a sawi bawk.
“Kum 1986-a India nen remna tura inbiaknaah Zohnahthlakte chu rorelna pakhat (administrative unit) hnuaia awm turin kan nawr a. India sawrkar chuan Danpui Article 3-ah a awmsa avangin comment pek ngai an ti lo. Hei hi Peace Accord-ah ziahlan a ni a. Manipur unaute nena hmalakna chu a inchiah ta vang vang a ni,” MNF president hian a ti.
Tunah Manipur chu a buai ta a, chutihlaiin kan duh dan kan barh luih a rem lo, tiin, “Article 3-na angin duh an thlang thei. Keini chuan kan bei tawh a, martar thisena baptis thlap tawh an ni. Tunah chuan an kutah a awm tawh a, an inchhandam nan an duhthlanna a pawimawh. Keini chu Pu Denga hunlai atangin kan dinna a la ngai reng,” a ti.
Nationalism chungchangah party dangin MNF chu independence sual lo, tiin sawi mah se, thangthar leh zirlaiten an rawn chhang thin a; nationalism an rawn champion pui ta zel tih a sawi a. Thenkhatin nationalist rawn inti mah se, sabengtung, sakei vun sin ang chauh an ni tih a sawi a ni.
“Hming hrang hrang rawn invuahin tuma tih ngai loh, campaign-na kutdawh account nen an rawn ti. Hei hi kalphung thar chu a ni! Engang pawhin kalphung thar ti mah se, kum 40 chhungin tuman an enchhin duh lo. Hnam neitu Zoram tana thisen hlantute thisen man chu midangin an claim thei lo,” MNF hruaitu Zoramthanga hian a ti.