Inthlanthat hma in cooperative society kalphung siamthat an duh

Inthlanthat hma in cooperative
society kalphung siamthat an duh
Cooperative society-ah hruaitu nihna chelh theih chin siam dan paih an duh a, an inthlan that hma ngeiin sawrkarin siamthat sak turin an duh tih Mizoram Cooperative Apex Bank Ltd. chairman T Lalmuanpuii chuan a sawi.
Thuthar thehdarhtute hnenah, Mizoram Stte Level Cooperative Societies Coordination Committee-in Mizoram Cooperative Societies Act Section 53 hnuaia proviso – “Cooperative Society hruaituten kum 10 aia rei hruaitu nihna an chelh theih lohna dan” chu paih tura sawrkar an ngen thu T Lalmuanpuii hian a sawi a. He proviso hi cooperative hmasawnna daltu, mipui rorelna tura dan kalh a ni tih a sawi.
He proviso paih chungchang hi Registrar of Cooperative Societies-in state level cooperative society zawng zawngte an Assembly theuha ngaihtuah tura a tih thu hnu in, kum 2016-a an general assembly theuhah society zawng zawngin he dan hi paih ngei duhin zaa za in ban an phar tih a sawi bawk.
He dan paih chungchangah hian chief minister thurawn anga Mizoram hmun hrang hranga society-te signature leh seal lakhawmin an thehlut tawh tih Cooperative Apex Bank chairman hian sawiin, “He hmalakna hi kan ngaichang mek a. State Level society leh primary cooperative societies duh loh tak dan chu kumin June thlaa inthlan hma ngeia paih ngei kan duh a ni,” a ti.
Mizoram chu cooperative movement hmanga tih hmasawn theih nia a hriat avanga sawrkar hna (police) bansan a, a hun puma cooperative hmasawnna atana thawk tura a inpek thu T Lalmuanpuii hian a sawi a. Board member dangte leh hnathawktute nen thawh hona tha tak an neih thu leh, Apex Bank chairman a nih hnu atangin loan chhia an neih tlem thu a sawi a. India rama cooperative bank hmasawnn berte zingah NABARD-in a chhinchhiah tih a sawi.
Apex Bank chairman sawi danin, tunah hian ATM booth 26 leh mobile ATM pahnih an nei a; an ATM hi Mizo tawnga display awmchhun a ni. Hnathawktute tih chak leh chawhphur a pawimawhna hriain thawktu thar mi 63 an lak thu leh mi 83 an kaisan tir a, tunhmaa thawktuten pension an neih loh laiin thawktute pension an siamsak tawh tih a sawi a ni.
Zawhna chhangin T Lalmuanpuii chuan, MLA-a in candidate tum anga thuthang awm chu thu belhchian dawl lo a ni a, khawi party atanga mahin kumin inthlanah MLA chuh a tum lo tih a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More