Intimate hygiene

Intimate hygiene
Kegel8 managing director Stephanie Taylor-i’n hmeichhia te tana hmeichhiatna enkawl dan tha leh hmeichhiatna hriselna atana pawimawh ni a a sawi te kan rawn tarlang e. Stephanie Taylor chuan, “Hmeichhia ten lalnu anga enkawl kan thlahlel theuh a, chutih rualin kan tana pawimawh ber, kan hmeichhiatna kan enkawl danah kan tisual ve leh thung thin si a. Kan hmeichhiatna a hrisel a, a dam that hian kan hlim a, kan nun a nuam thin a, kan vun, tin leh sam te kan uluk ang bawkin kan uluk ve tur a ni,” a ti. Tun tumah hian hmeichhe tana hmeichhiatna enkawldan tha leh hriattur pawimawh ni a a sawi te kan rawn tarlang e.
1. Tunlaiah hmeichhe tam zawk chuan an hmeichhiatna hmul an ziat fai a, hetia an tih hian fai leh thianghlim riaua inhriatna an nei a, a nuamin a sexy riauin an hre bawk thin. Mahse, kan hriat reng tur chu hmeichhiatnaa hmul awm hi bacteria leh infection, heng Folliculitis lakah te min vengtu a ni a, thlan tui te lo hipin, thil thapin a nawk tur vengtu a ni bawk. Tunhnaiah survey an neihah hmeichhia 84% chuan an hmeichhiatna hi an met fai a, chung zingah 50% chuan a hmul zawng zawng an tifai vek.
2. Kan hre kher lo mai thei, hmeichhiatna hi ama tawka intifai thei a ni a, chumi atan chuan bacteria tangkai tak Lactobacilli a awm. Mahse, inbualna sahbawn rimtui, shower gel, bubble bath, moisturiser leh wipes tih vel hmanga hmeichhiatna kan tihfai ngun lutuk chuan he pH level balance hi a tibuai a, bacterial vaginosis te kan neih phah thei. Chuvangin, intihfaina tur i lei leh dawnah chuan perfume-free emaw sensitive product emaw i zawng tawh dawn nia.
3. Underwear danglam leh sexy deuh hak te hi nuam kan tiriau a ni mai thei, mahse, hei hi urinary tract infection (UTI) thlen thei a ni tlat. Underwear thenkhat hi chu kan hriselna atan a that loh avangin hak tur thlan thiam a pawimawh. Kekawr mawngzep ang chi te leh kekawrte tight lutuk, vun nawk nasa lutuk te hi nileng lenga kan hak chuan UTI neih phah theih a ni. Eng kekawrte pawh ha dawn la cotton thlang ang che, hei hian hmeichhiatnain thawk a lak ve theihna ber a ni a, a uap lo va, a hawng churh lo bawk.
4. Tui in tam hi taksa hriselna atan a pawimawh tih kan hre theuh, mahse, hmeichhia ten kan hmeichhiatna atan tui in tam a pawimawh tih hi chu kan hre kher lo mai thei. Nitin tui tam tawk in chu harsa kan ti thin, mahse, kan taksain tui a hmuh that that loh chuan kan hnuailam pawh a lo ro ve zel a, chu chuan infection, thak leh sa deuh hut hut te pawh a thlen thei. Ni tin a tlem berah tui litre 2-3 tal in i tum dawn nia.
5. Hmeichhe tana hriattur pawimawh tak chu nupa nun hman zawhah zun thin tur a ni. Hetia nupa nun hman zawh a zun hian urinary tract leh serh kua a bacteria te a tleuh chhuak a, UTI risk a tihniam. Nupa nun hman zawh veleh i zun a chhuak lo a ni mai thei, mahse, lungngai suh, han hahdam deuh la, darkar khat hmaa i zun theih chuan a tha tho e.
6. Exercise lak zawhah thawmhnaw ngai ha chungin rei tak tak awm loh tur. Exercise kan la a, thlan a lo chhuak a, kan thawmhnaw te a lo huhin a lo hnawng thin. Chuvangin chutiang exercise lakna thawmhnaw chu rei tak tak hak zui tur a ni lo va, kan hak reng khan bacteria a lo inthlahpung thuai a, latex emaw polyester emaw hmanga siam thawmhnaw kan hak phei chuan bacteria a pung chak lehzual. Chuvangin exercise lak zawhah inbual fai thuai a, thawmhnaw fai tha hak leh tur a ni.
7. Mahni thlatin hunbi neih dan hi hriatchian tum tur a ni. Thla tin hunbi hi a lo thleng dawn tih hi a hriat lawk reng theih bik lo a, a hun awm vel hi chu mahni inchhinchhiah peih tan chuan hriat ve theih a ni a ni a, lo inrinlawk dan thiam ve theih a ni. Thla tin hunbi a lo thlen chuan a ni khatna leh ni hnihna chu a nasat vanglai a ni thin a, hetiang hunah hian pad hman te regular taka thlak thin tur a ni a, darkar li danah tal thlak tum tur a ni. Tampons i hmang duh zawk a nih chuan i hman theih zinga a size tê ber zel hman tum la, darkar riat aia rei dah loh tur a ni a, dah rei lutuk chuan Toxic Shock Syndrome (TSS) risk a tisang.