“Intodelh”

AH&Vety department changtu minister C Lalsawivunga chuan Thenzawla AH&Vety farm a tlawh a. Sa leh bawnghnuteah Mizoram kan intodelh theih nan beihpuithlak a ni dawn, a ti a. Saa kan intodelhna tura hmanraw pawimawh ber te zinga mi chu ran chaw (fodder) a intodelh hmasak hi a ni, a ti bawk.
Minister-in a sawi dan chuan, Mizorama bawng vulhtute chu an bawng vulhna hmun thleng department motor-in ran chaw a phurhsak dawn a, ran chaw man chawi loin a phurhna senso chauh an chawi dawn a ni. Zo vawk pawh, mipui nawlpuiin an vulh uar lehzual theih nan department chuan tan a la mek bawk.
Minister hian saa intodelh chungchang a sawinaah hian bawngsa a kawk deuh bik niin a lang a; ran chaw tih pawh hian bawng chaw a kawk deuh bik awm e.
‘Ran chaw-a intodelh hmasak’ tih hian a kawh deuh nia lang chu, ran vulhtuten eng zata tam pawh ran vulh se, state dang atanga chawkluh ngai lova kan state chhunga ranchaw siamchhuahin a chawm zo tur a ni, tihna a ni ber awm e.
Sawrkar hrang hrang kan hrawn tawh a. Sawrkarna han chelh thar hlim hian ram hruaitute hian a huap zau thei ang berin duhthawh takin thu an sawi thin a, ‘beihpui kan thlak dawn’ tih hi a ri zing tawh hle; mahse, tun thleng hian tih hlawhtlin a la awm lo niin a lang. Chungte chu- ei leh bara intodelh (buh leh thlaia intodelh), saa intodelh, kawlphethaa intodelh, mipui hnena tui in tur hnianghnara pek, world class education, organic state etc.
Tunah pawh minister hian ‘saa intodelh’ tih a rawn sawi ri ve leh ta a. Tunhmaa lo hriat than tawh a nih avangin mipui lam pawhin rin ngam harsa ti rilru tak chungin hma lam kan thlir leh ta mek a. Hei hi chona lian takah minister hian ngai se, Mizoram hi saa intodelh state-ah hlangkai se, mipui lam pawhin dinhmun sang zawkah an hlang kai zui ngeiin a rinawm.