Iran-a Indian-te ramri hnaih lo turin thurawn pe

India chuan Asia khawthlang lama indonain kar hnihna a hman mek laiin Thawhtanni khan Iran-a a khua leh tui awm mekte tana kaihhruaina a tichhuak a, Tehran-a Indian Embassy nena indawr hmasa lo chuan ram pawna zin lo turin a ti.
Embassy pawhin Indian-te chu kaihruaitu rinngam tak nei lo chuan eng ramri mah hnaih lo tura ngenna a tichhuak ve bawk.
Embassy-in inkaihhruaina a tichhuahah hian, “Indian-te chu embassy nena inremna siam hmasa lovin ram pawna zin turin Iran ramri engmah pan lo turin kan hriattir a. Khawmuala ramri kânna lai panna kawng eng pawh embassy atanga kaihhruaina tha tawk tak hmuh hnuah chauh kalpui tur a ni,” an ti.
Kaihhruaina tihchhuahah hian Indian tu pawh, Iran ram paltlanga ram dang a lut thei leh si lo a nih chuan embassy-in tanpuina a pe thei dawn lo tih tar lan a ni bawk.
“Mi mal tinten Iran an chhuahsan a, ram dang an luh theih loh hunah embassy hian tanpuina pe thei dinhmunah a ding lo thei a ni,” tiin Iran-a Indian-te tana rikruma biakpawh tur phone number an tar lang.
Iran-a a mi leh sate tana India-in thurawn thar a pek hi Islamic Republic-in Supreme Leader thar atan an thahsak tak, Ayatollah Ali Khamenei-a fapa, Mojtaba Khamenei-a an neih hnuah niin tunah pawh an ram boruak hi a la tang hle.
US President Donald Trump-a chuan rinlawk ang ngeiin Mojtaba chu Supreme Leader thar atana thlan a ni chu ‘pawm theih loh’ tiin a sawi a, Iran chu inpe turin a phut.
Supreme Leader thar ruat a nih hnuah pawh indona kal mekah inbengdaihna hmuh tur a la awm lo zel a, Iranian defence council chuan thuchhuah siamin, “Kan thisen far hnuhnung ber thlengin commander-in-chief thu kan zawm ang,” a ti.