Iran-a lungawi loh lantirnaa sorkar chet dan lanna video darh

Iran-a lungawi loh lantirnaa sorkar chet dan lanna video darh
Tun hnaia Iran-a mipuiten lungawi lohna an lantir laia video lak darh thar mekah damdawi ina ruang awm khawm tam tak te, in chhawng sang chunga mi ralsai thiam dah leh CCTV camera tihchhiatte a lang a, hei hi sorkarin an laka lungawi lote tharum hmanga a beihna ni ngeia ngaih a ni.
December thla tawp lam atanga Iran puma lungawi loh lantir a nih khan internet tihthih deuh vek a nih avangin mipui thi zat pawh hriat dik theih lohvin a awm a ni.
US-a Human Rights Activists News Agency (HRANA) chuan mi 6,000 dawn thah an ni a, heng zinga 5,633 chu mipui zinga mi an ni tih a sawi a. Tunah hian thihna 17,000 vel thleng chu an chhui chiang mek tih an sawi bawk.
Pawl dang, Norway-a Iran Human Rights (IHR) chuan thi hi mi 25,000 an tling thei niin a sawi bawk.
Iranian thuneitute erawh chuan kar hmasa khan mi 3,100 chuang thah an nih thu an sawi a, heng zinga a tam zawk hi venhim hna thawktu leh buaina chhuahna hnaiha lo awm, ‘mipui thinrimin an tihhlum’ niin an sawi bawk.
Video darh thar hi January 8 leh 9-a Shah thi tawh fapa tlan bo mek, Reza Pahlavi-a’n mipuite chu ram puma lungawi lohna lantira che tura a fuih hnu lawka thleng nia hriat a ni.
He zan hnih hi mipuite tawrhna a thlen nasat ber tum nia hriat niin video-ah hian Iran-a venhim hnathawktuten tharuma an beih let dante a lang.
Clip tam takah Tehran khawchhak lam, Tehranpars damdawi ina ruang tam tak awm pawh a lang a. Video pakhatah chuan ruang 31 a lang a, clip dangah damdawi in luhna bula ruang dahna ip pasarih a awm bawk.
Video dangah Tehran khawthlang lam kawngpuiah mi za tel an pungkhawm a, nasa taka silai puak ri leh hlauva te ri hriat tur a awm bawk.
Lungawi lote pawh hian Iran-in CCTV camera a dahte an tichhe lai pawh a awm ve tho bawk a. An khawpui pakhatah hian mi pakhat banah lawna camera tihchhiat tuma an bei lai a lang a, a hnuaia lo awmte lawm taka an au lai a lang tel.
Chhimchhak lama Kerman khawpuia video lakah chuan in chhawng sang chunga silai keng sipai, lei lama awmte kap lai a lang a, tute nge a kah erawh chiang taka hriattheih a ni lo va. A hnuai kawngpuiah hian mi tam vak lovin lungawi lohna an aupui thawm erawh a hriat theih.
In chhawng sang chunga ralsai thiam dah pawh a awm a. Hmarchhaka Mashhad khawpuia video lakah a duma inthuam mipa pahnih in chungah an awm a, pakhat chu silai lian tak nen bang nghengin a ding a, phone a hmang a. Pakhat chuan mei a zu thung.
January 8 atanga ram pum deuhthawa internet tihthih a nih avangin Iran-a thil thleng hi hriat vek a har rih a, SpaceX-in Starlink satellite internet an siam lehvirtual private network (VPN) chuah hman theih rih a ni.