Iran-in US hnial, an rama nuclear inpector luh phalna la pe lo

Indo titawp tura a vawi khat nana US leh Iran an inbiak hnua Vice-President JD Vance-a’n Tehran-in an ramah nuclear inspector-te luh leh a phalsak dawn nia a sawi chu Tehran chuan a dik loh thu a sawi.
Switzerland-a inbiakna neih a nih hnuah Vance-a chuan International Atomic Energy Agency (IAEA) nena sawiho zuina chu ‘vawiin atangin’ a thlen thuai theih thu a sawi.
Hetih lai hian Iranian foreign ministry chuan sorkar chanchinbu hnenah Tehran hian nuclear endik chungchangah thutiam thar a siam lo tih a sawi.
US-in a hrekna tam tak erawh hlih a ni a, kum tam tak chhunga a vawi khat nan Iran hian a tuialhthei chu US dollar-a hralh a phalsak a ni.
US Treasury-in Thawhtannia ni 60 chhung hrekna a hnuh kir lailawkna a puan chu Washington-in hun rei tak chhung Tehran eibar nghawngtu hrekna a lo siam tawh a tihtawpna a ni.
Hrekna hlih lailawk hmang hian August 21 thleng Iran chu tuialhthei thlitfim loh leh petrochemical siam, hralh leh thawn chhuah phalna pek a ni a. US-ah pawh lak luh theih a ni ang.
Bank-a pawisa inthawn, insurance leh transportation te pawh a hawng a, Iran-in a hmaa tuialhthei hralhna atana a hman thin kalkawng buaithlak zawh kher ngai lovin an kalpui thei ang.
Treasury Secretary Scott Bessent-a chuan ni 60 chhunga ngaihhnathiam chhung hian Tehran-in Strait of Hormuz chu a hawna IAEA nuclear inspector-te chu an rama luh leh phalsak turin a intiam tih a sawi.
Thawhtanni tuka Switzerland-a thuthar lakhawmtuten an zawhnaah Vance-a chuan nuclear inspector-te Iran-ah an kal theih hun tur chu ‘tun kar chhung’ a nih a beisei thu leh ‘vawiin pawh a ni mai thei’ tih a sawi.
US President Donald Trump-a pawhin social media-ah Iran chuan ‘ralthuam endik a remti dawn’ tih a tar lang bawk.
Hetih lai hian Iranian sorkar news agency Irna-in a biaknaah foreign ministry thupuangtu, Esmail Baqai chuan Tehran-in nuclear inspector-te chungchangah thutiam thar a siam lo tih a sawi.
UN inspector-te nena inpawhna chu ‘Parliament leh Supreme National Security Council-in kalphung awmsa hnuaiah’ tih a nih dawn thu a sawi a. IAEA pawhin engmah a la sawi lo.
Iran hian nikum nipui laia ni 12 chhung an indo tum atang khan Israel leh US-in an bomb hmunte IAEA-in a luh theihna a titawp a. A hnu thlaah UN nuclear watchdog hian an inspector-te a la chhuak zui a ni.
Kum 2015 khan Iran leh ram lian paruk – US, China, France, Russia, Germany leh UK te nen an nuclear hmunte IAEA-in a endik theih nan inremna an lo siam tawh a ni.