Israel leh Hamas chuan thla 15 an indo hnuah Gaza-a inkahhai leh mi an inhrensakte chhuah turin inremna an nei ta tih inbiaknaa palai, Qatar leh US chuan an puang.
Qatari Prime Minister Sheikh Mohammed bin Abdul Rahman Al Thani chuan inremna hi Israeli cabinet-in a pawm hnuah Pathianni atangin kalpui tan a ni dawn tih a sawi.
US President Joe Biden chuan ‘Gaza-a inbeihna a titawp ang a, Palestinian civil mi puih mamawh em emte hnenah puihna a thleng ang a, mi hrente pawh an chhungte nen an inhmu leh thei dawn’ niin a sawi.
Israeli Prime Minister Benjamin Netanyahu chuan inremna kimchang nei tur hian thil kalpui zel a ni tih a sawi a, Biden-a chungah lawm thu a sawi a. Hamas hruaitu, Khalil al-Hayya chuan Palestinian-te ‘tan tlatna’ vanga awm niin a sawi thung.
Palestinian leh Israeli mi hren mek chhungte chuan he thu thar hi an lawm hle a, Gaza-a indona hmunah erawh thawm danglam a awm phah lo.
Hamas hnuaia Civil Defence agency chuan Qatar-in inremna a awm tih a puan hnuah pawh Israeli thlawhnaten mi 20 chuang an kap hlum leh niin a tar lang a. An zinga 12 hi Gaza City-a mi pangngai chenna, Sheikh Radwan vengah a ni tih an sawi a, Israeli sipaite erawh chuan he thil hi engmah an sawi ve rih lo.
Israel hian Hamas-te hi mi firfiak tia sawiin October 7, 2023-a an ram chhum lam beia mi 1,200 an thah leh mi 251 hruai hawa an hren phuba lak nan a bei a ni.
Hamas hnuaia health ministry chuan Israel-in a beih hnuah hian Gaza-ah mi 46,700 chuang an thi tawh niin an sawi a. Mi maktaduai 2.3 vel baihvaiin an awm phah a, an chenna in leh lo leh hmunte chhiain ei tur, tuialhthei, damdawi leh chenna tur an nei lo tak zet.
Israel chuan Hamas hian an mi 94 an la hreng niin an sawi a, an zinga 34 phei chu thi tawhah an ngai a. Heng bakah hian Israeli dang pali, indona a chhuah hmaa an ruk bo an la kawm niin an hria a, pahnih hi thi tawhah an ngai bawk.
Qatar prime minister chuan inkahhai inremna thawh khatna, chawlhkar ruk chhung awh turah hian hmeichhia, naupang leh upa deuh telin mi hren 33 chhuah an ni dawn a. Israel hian an lung ina Palestinian an tantir an chhuah ve bawk ang.
Hemi chhung hian Israeli sipaite chuan Gaza-a mihring chen tamna, khawchhak lam chu zawi zawiin an chhuahsan ang a, Palestinian tlanchhe mekte pawh an haw khawm phalsak an ni ang a, anmahni puihna tur phur lorry tam zawk tirh luh an ni ang.
Thawh hnihna mi hren dang chhuah zui an ni ang a, Israeli sipaite pawh an zavaiin an chhuak tawh ang a, hemi tur hian thawh khatna hman atanga ni 16-ah indawr that leh a ni ang.
Thawh hnuhnung ber hi Gaza tun din thar lehna tur a ni a, hei hian kum tam tak a awh dawn a, mi hren thi ruangte pawh an chhungte hnenah pek kir an ni ang.
Israeli cabinet hi Ningani tukah khan an thukhawm nghal a, inremna tur hi an pawmpui.
Inkahhai leh Israeli hren mek chhuah hmasak pathum chu Pathianniah hian tih nghal a nih rin a ni a, Hamas hruaitu pakhat chuan hemi tur hian Ningani zan atangin an tih tur an ti tan dawn tih BBC a hrilh.
Sheikh Mohammed-a chuan inbiaknaa palai hna thawktu – Qatar, US leh Egypt te chu inremna an neih a taka tihlawhtling vek thei turin Israel leh Hamas hi an thawhpui that a ngai dawn hle niin a sawi.
“He thil hi indona phek tawp ber a nih kan beisei a, tha taka kalpui a nih theih nan tute pawh an inpek kan brisei bawk a ni,” a ti.
US president ni mai tawh tur, Donald Trump-a chu inremna neih thu puang hmasatu zingah telin White House leh Qatar pawh a khalh hial a. Thawhtannia lak luh a nih hma ngeia inremna neih ngei tumtu a ni.
Israeli Prime Minister Netanyahu-a pisa pawhin mi hrente chhuah an nih theih nan leh a tuartu chhungte tawrhna tihtawpa a awm theih nana a puihna Trump-a chungah lawm thu an sawi tih an tar lang.
Israel-ah hian Netanyahu-a thawhpui thenkhat chuan inremna siam hi an duh lo va; mahse, kaltlangpui a ni danw ta tho va. Cabinet-in an pawm hnuah Palestinian mi tang an chhuah turte pawh sorkarin a puang zui dawn a ni.
Israel-Hamas ten inremna siam
Get real time updates directly on you device, subscribe now.
Next Post