Bangladesh Supreme Court chuan prime minister hlui, Khaleda Zia-i chu kum 2008 ei ruk thubuaiah a chhuah zalen a, a hmaa kum 10 lung in tang tura an lo tih tawhna chu a hnawl a ni.
Kum 2018 khan high court chuan Zia-i leh mi dang eng emaw zat chu prime minister a nih tawp hun, kum 2001 leh 2006 inkara hnuchhamte puihna tur sum dik lo taka an lo hman avangin a hrem.
A chunga court thutlukna hi court sang zawkah ngaihtuah tha turin a thlen a, Chief Justice Syed Refaat Ahmed-a kaihhruai judge panga awmna bench chuan Nilaini khan Zia-i leh mi dang, a fapa, Bangladesh Nationalist Party (BNP) chairperson ni lailawk mek, Tarique Rahman pawl telin, thiam a chantir leh ta zawk a ni.
“He thubuaia tel ve zawng zawng, ngaihtuah tha tura thlentu leh thlen ve thei lo zawng zawngte pawh an zavaiin thiam chantir an ni,” tiin an dan hre mi, Zainul Abedin chuan thutlukna puan hnuah thuthar lakhawmtute hnenah a sawi.
Tun tuma court-in a chungthu a ngaihtuaha thutlukna a siam hi kum 79 mi, Zia-i leh an rama politics thununtu political party lian pahniha pakhat zawk, BNP chhungkuaa mite chunga thutlukna hnuhnung ber a ni.
Nikum November khan Zia-i hi ei rukna thubuai dangah pawh thiam chantir a lo ni tawh a. He thubuai hi kum 2005-a trust dang sum tur taka maktaduai 31.5 zet dik lo taka hmanga puhna a ni.
Tun thla tir lam khan amah hi damdawia inenkawl turin London-ah a kal a, a natna zingah hian chuap vung leh lung tha lo pawh a tel.
August thla atang khan Prime Minister Sheikh Hasina-i kaihhruai sorkar chu mipui lungawi lovin paihthlain India-ah a tlanchhe zui a, hemi hnu atang hian Bangladesh hi sorkar lailawk, Nobel Peace lo dawng tawh, Muhammad Yunus-a kaihhruaiin a hruai mek a ni.
Hasina-i paih thlak a nih hnu, August thla tawpah khan pawn chhuak thei lova hren, Zia-i pawh chhuah zalen ve nghal a ni a. Prime minister paih thlak tak hian kum 2020 khan Zia-i hi a hriselna dinhmun avangin lung ina tang lo turin a ngaihhnathiam a, a elpui rei tak ni tawh hi ram pawna a zin leh politics-a a inhman erawh phalsak a ni chuang lo.
Ei ruk thubuaiah PM hlui Zia-i thiam chantir
Get real time updates directly on you device, subscribe now.
Next Post