Turkey inthlan pawimawhah CHP te chak

Turkey-a opposition party lian ber chuan khawpui lian leh pawimawh pahnih Istanbul leh Ankara a inthlanah chakna an chang a.
Opposition tena chakna an chan chu Recep Tayyip Erdogan, president term thumna a chelhna kum khat em pawh a la tling lo tih atan chuan channa nasa tak a ni thung.
Istanbul a seilenna leh mayor a nih tawhnaah phei chuan campaign nasa in theihtawp chhuahin atang a.
Mahse kum 2019 inthlana Istanbul khawpui mayor atana thlan tlin tawh Ekrem Imamoglu chuan secular opposition CHP hmingin a zawnin hnehna a chang leh ta a ni.
Erdogan chuan Turkey megacity mihring maktaduai 16 chuang awmnaah bung thar kaipui a intiam chungin CHP te chuan vote 50% chuang hmuin AK party candidate chu 11 points chuanga hnehin vote maktaduai khat dawnin an inhneh a ni.
Capital Ankara-ah pawh opposition mayor Mansur Yavas chuan a elpui lakah 60% in hma a hruai hnuah chakna a chan thu a puang a.
Hei mai bakah hian CHP te chuan Turkey a khawpui lian der palina Bursa leh hmar thlang lama Balikesir ah pawh chakna changin Izmnir, Adana leh Antalya ah te pawh an chak zui bawk.
Kum 70-a upa President Erdogan chuan inthlanah an beisei ang result an neih loh thu a sawi a, mahse, ‘kan tawpna ni lovin kan hun inher tan hun pawimawh tur a ni’ tiin a sawi a. Mipui duh dan zah reng a nih thu sawiin tun inthlan result pawh an pawm thlap thu a sawi bawk.
Recep Tayyip Erdogan kaihhruaina hnuaiah Turkey presidency chuan thuneihna sang tak nei tawhin prime minister a thlak tawh a. Mahse, khawpui lianah te chuan direct a thlan mayors te chuan thuneihna sang tak an nei thung.
Election campaign neih laiin Erdogan chuan a presidential term kum 2028 tawp rualin a chawlh tawh tur thu a sawi a. Mahse, sawisel tute chuan tun inthlanah chakna chang se chuan president a la nih zel theih nan constitution a siam danglam duh leh ang an ti thung.
Political scientist Berk Eksen chuan opposition CHP te chuan ‘Erdogan political career a hnehna a tawrh nasat ber an thlen’ tiin a sawi.
CHP tena chakna an chan theih nana pawimawh bera ngaih chu chairman Ozgur Ozel niin voters te chuan Turkey hmelhmang thlak danglam an duh tawh tia sawi tu niin kan ramah mipui ten political climate thar awm se an duh a ti a ni.
Istanbul khawpuiah mipui tam tak pungkhawmin Turkish flag leh banner Ekrem Imamoglu leh Turkey founding father Kemal Ataturk te chuanna te an vai a.
“Khua leh tui tena rinna min nghahna chu lantirin a awm a ni” tiin Imamoglu chuan a sawi. Imamoglu leh Mansur Yavas te chu kum 2028 a presidency chuh tura candidate ni thei dun bera ngaih an ni bawk.
“Engkim a tha vek ang” tiin Imamoglu chuan a sawi bawk a.he tawngkam hi kum nga kaltaa Istanbul mayor atana thlantlin a nih hnua a phuhchhuah a ni a, kumin inthlanah erawh slogan berah ‘Hma lam panin chak takin’ tih chu hman a ni thung.
“Tualchhung inthlan mai chauh a ni chungin khawpui lian ber beraa opposition tena chakna an chang hian awmzia thuk tak a nei tlat a ni” tiin Imamoglu thlawptu Yesim Albayrak chuan a sawi.
Kum 27-a upa Mehmet Bankaci pawhin Turkey chuan inthlak danglam a mamawh tiin a sawi a. “Nikum presidential election ah khan Imamoglu emaw Mansur Yavas emaw te CHP candidate ni se chuan an chak tho ang” tiin a sawi.
Istanbul khawpuiah hian Turkey population 85 million zinga hmun ngaa thena hmun khat awih an awm a. Istanbul khawpui thununtu chuan turkey economy pawimawh sumdawnna, toursim leh finance an thunun tihna a ni.
Kum nga kalta khan Imamoglu chuan kum tam tak AK party tena Istanbul a rorelna an lekkawh tawh chu opposition party dang t thlawpna nen an chhuchat a. Mahse, opposition unity chu nikum presidential election dawna tihkehchhiat niin chuvang chuan AK party te chuan tun tum inthlanah pawh chakna an chan zawh an ring a ni. Pathiannia inthlanna neih hma lawk khan AK party candidate Murat Kurum chu a that ve bawk em avangin chak zawk tur hriat chian theih loh tia sawi a ni bawk.
Mahse ruling party te chuan Turkey-in economic crisis a tawh mek tuna inflation rate pawh 67% lawih leh interest rat 50% ni mek avanga sawiselna chu an thingthla hleithei lo a ni.
Tihian Turkey khawthlang, chhim leh hmar lam zau tak chu opposition CHP te thunun a ni tawh a, pro-Kurdish Dem party te chuan chhim chhak an thunun thung a.
Erdogan party AK te chuan central turkey thununin leh February 2023 a lirnghing natakin a nuaina chhim chhak lamah hma an sawn bawk.
Erdogan chuan Ankara a party headquarter a thusawina aneihah presidential election kum li hnua la neih hma in kan insiam tha ang a, kan tihsual te kan siam tha vek ang a ti zui bawk.
Tun tum inthlanah hian Turks maktaduai 61 vel ten vote an thlak a, vote tum khat thlakna maktaduai chuang an awm bawk a. Turkey province 81 ah inthlanna neih niin vote tla pawh 77% vela ngaih a ni.