Israel-in Gaza-a ram dang sipai luh a phal ta
Israel chuan US President Donald Trump-a rawt anga Gaza-a inkahhai kalpui dan tur ruahmanna awm angin ram dang venhim hna thawktute luh a phal ta tih Israeli thuneituin Pathianni khan a sawi a, Prime Minister Benjamin Netanyahu-a’n Washington a pan hma lawka puan a ni.
Netanyahu-a security cabinet chuan Pathianni khan ruahmanna siam anga Gaza-a ram dangte sipai luhtir hi an pawm tih thuneitu hian a sawi a. Prime minister hian Thawhtanni khan Washington a pan a, Thawhlehni hian Trump-a nen an inkawm ang.
Israeli thuneitu hian International Stabilization Force tia sawi mission hnuaiah hian ‘Uganda leh Morocco ang chi kan thian tha ramten’ Israeli-te thunun loh lai hmunah sipai an dah ang a, Gaza-a lut turte hian Israeli pawmpuina erawh mi mal mala an neih vek a ngai dawn tih a sawi.
Khawi ramte nge sipai hi tir dawn tih erawh a la chiang lo.
October 7, 2023-a Hamas-ten Israel an beiha lehlamin chhan let nana Gaza an rûn hnuah kum hnih indona chhuakin Gaza hmun tam zawk hi chhe takin a la awm.
October khan inkahhai puan a ni a, Trump-a chuan Gaza-a muanna a awm theih nan rawtna siamin puihna tam zawk a luh theih dan tur pawh duan a ni a. Hemi atan hian Hamas-ten an ralthuam an dah ang a, Israeli sipai awm mekte an chhuak bawk ang.
He ruahmanna hi a taka kalpui erawh a la awm lo va, National Committee for Administration of Gaza (NCAG) an tih, hmalatu turte pawh Gaza an la lut hleithei lo.
Israel hian Gaza hmun 64% vel thunun mekin mi maktaduai hnih vel zet vaukam hrul zai zai, Hamas thununna hnuaiah an cheng a. A tlangpuiin puan in kaih leh indona avanga in chhe tawh tak takah an awm hlawm.
Hamas hian an ralthuam dah an duh lo va, Israel-in Gaza thunun an tum bawk a, ni tin inbeihna a la awm reng.
Trump-a rawtnaah hian Board of Peace an tih, khawvel ram hrang hrangte telna tur, muanna a awm theihna atana ruahmanna kalpuitu tur a tel bawk a. Anni hian venhimna kalpui dan leh thil dang dang an enpui dawn a ni.
Board pawh hi a taka hmalakna a la awm thei tak tak lo va. Gaza-a an palai, Nickolay Mladenov-a chuan Israeli-te thutlukna siam thar chu lawmawm a tih thu a sawi tawh thung.
“Gaza a ngialngheha inbeihna a awm loh nan leh NCAG hnuaia Palestinian-te chunga thuneitu inthlakna a awm theihna tura thutlukna pawimawh tak a ni,” tiin X-ah a tar lang.