Israel-in indo a tihtawp loh chuan UK-in ramah Palestine pawm tum
British Prime Minister Keir Starmer-a chuan September thlaah Israel-in Gaza-a indona a kalpui titawp tura ‘hma lakna’ a neih lohva muanna tluantling awmna tura a che lo a nih chuan United Kingdom-in Palestine chu ram pakhata a pawm tur thu cabinet thutkhawmah a sawi.
Sorkarin Thawhlehnia emergency cabinet meeting zawha thuchhuah a siamah Starmer-a hian Istael-in inkahhai a pawm lohva West Bank luah zauh a tum a tawpsan loh bawk chuan he thil hi New York-a United Nations General Assembly neih hmaa an kalpui tur thu a sawi a, ram hrang pahniha pawm turin kawng a zawh dawn tih a sawi a ni.
“Starmer-a hian Israel leh Hamas inkara ngaihdan hrang kan nei lo va, Hamas laka kan phut chu a la ngai reng a, an mi hrente chhuah vek leh inkahhai tura hming ziah, Gaza-a sorkara engmah inrawlh loh leh ralthuam tun a ni,” a ti.
Starmer-a hian a minister-ten nipui chawlh an hman mek tibuaiin Europe ram kaihhruaia remna awm theihna tur leh UN-in tam tla mek nia a sawi, Gaza-a mi chengte puihna tam zawk pek luh dan tur sawi turin thutkhawm hi a ko a ni.
UK sorkar kal tawhte khan Palestinian ram din hi ‘a hunah’ chuan an pawm tur thu an lo sawi tawh thin a, hum tiam emaw, ‘chutih hunah chuan’ tih emaw an nei ngai lo.
Israel chuan UK thupuan chu a lawm lo hle a, ‘Hamas tana lawmman’ a nih thu leh Gaza-a indona titawp tura palai hmanga indawrna engmaha ngaih lohna chauh a nih thu a sawi ve nghal.
Israeli foreign ministry chuan UK chet dan chuan inkahhai awm theihna a tichhe sawt zawk niin X-ah a tar lang a. Israel hian inkahhai puang tura indawrna hi March thla khan a lo kalpui tawh a ni.
Starmer-a hian a thutlukna hi vantlanga puan a nih hmain phone-in Israeli Prime Minister Benjamin Netanyahu pawh a hrilh hmasa tawh niin Reuters chuan a tar lang a. A bak an inbiak zuina erawh hriat a ni lo.
Hetih lai hian US President Donald Trump-a chuan Britain-in ruahmanna a siam chungchangah Starmer-a nen an inbiak loh thu a sawi.
“Engmah kan sawi dun lo,” tiin Air Force One-a chuang paha Thawhlehnia thuthar lakhawmtuten an kawmnaah a sawi.