Israel-in Qatar a beihnaah kan hruaitute an him – Hamas

Israel chuan Thawhlehni chawhnu her hret khan Qatar khawpui, Foha-a Hamas hruaitu lawkte a bei a; mahse, an mi thah tum berte hi an him niin hel pawlin an sawi.
Qatar chuan he thil thlengah hian Israel chu ‘rawva taka che’ tia sawiin khawvel dan zam bawhchhiain khawpuia mihring chenna lai an bei niin a puh nghal.
Israel Defense Forces (IDF) chuan ‘October 7-a rawng taka mi suatnaa mawhphutu bulpuite’ an bei niin an sawi.
Doha-ah hian thil puak ring tak tak leh van lama meikhu chho nguai nguai hmuh a ni a. Video thehdarhah chuan khawpui laili hmar lam, West Bay Lagoon district hnaih taka Woqod petrol station bul chiaha complex chhe tak leh mei khute a lang.
Israeli sipaite chuan Qatar-a Hamas hruaitu hlunte ‘an bitum’ a, ralthuam pawh ‘a bika duan’ an hmang niin an sawi.
Israeli chanchinbute chuan beihpui an thlaknaah Israeli fighter jet 15 thawk chhuakin hmun pakhat vawi 10 an kap niin an tar lang hlawm.
Qatar hian kum 2021 atang khan Hamas-a political bureau a mikhual a, October 7, 2023 atang khan hel pawl leh Israel inbiaknaa a meizanghlaptu ber a ni bawk.
Hamas thuneitu pakhat chuan an pawla inbiaknaa telte bitum an ni tih an sawi a. IDF chuan ‘Hamas hruaitu hlun’ an bei nia sawiin a mi mala an bitum bik hming tumah an sawi lo thung.
Israeli President Isaac Herzog-a chuan Hamas hruaitu ‘pawimawh bik leh dik tak’ an bei tih X-ah a tar lang a. Hamas chief negotiator, Gaza-a an hruaitu, ram danga tlan chhe mek, Khalil al-Hayya a thi niin a sawi a, ani hi an bitum ber chu a ni em tih erawh a sawi lo.
Israeli thuneitu sang pakhat erawh chuan Israeli chanchinbute hnenah al-Hayya-a hi an bitum pakhat a ni tih a sawi a, West Bank-a an hruaitu tlanchhe mek, Zaher Jabarin-a pawh an tum thu a sawi thung.
President Herzog-a’n an tum pakhat a thi nia a sawi laiin Hamas chuan zanah an hmelmate chu an hlawhchham thu an puang ve thung.
“Hmelmain inbiaknaa kan aiawhtu kan unaute thah tuma an beihna chu a hlawhchham tin kan finfiah tawh e,” tiin thu an chhuah.
An chet dan chuan Israeli Prime Minister Benjamin Netanyahu-a leh a sorkar chuan muanna atana inremna an duh tak tak lohzia a tar lang niin an sawi bawk.
Hamas thuchhuahah hian mi paruk erawh thi an awm thu an tar lang tel thung.
US pawh demin, “He thilah hian US sorkar pawhin mawh a phur a, kan mite nasa taka nekchep leh beiha an laka pawikhawihna thleng mek hi a thlawp a ni,” an ti.
Netanyahu-a erawh chuan anmahni bak inrawlh an awm lo niin a sawi a. “Israel-in a ruahman a, a ti ta bawk a, Israel hi a mawhphur vektu a ni,” a ti.
A hnu lawkah White House chuan beihpui thlak tur hi Doha dai mai, al-Udeid-ah airbase an neih avangin hrilh ve an ni tih a sawi a. Hetah hian President Donald Trump-a’n ti lo turin a hrilh thei a, a dang lo nia ngaih a ni.