Israel-in West Bank-a Judate in tur satu tur zawnna a tichhuak

k an luah theihna tura pawimawh leh sawi hlawh tak, mi chengte awmna tur 1,200 vel sakna tur tender chhan theihna hun a hawng ta a, hei hi sorkarin Palestinian-te ram a dinna tur tihtawpna tura a tih a ni.
E1 an tih, Jerusalem khawchhak lama in saa a mite luahtir a tumna hi khawvel ram tam takin an dem.
He hmalakna hian West Bank chu hmun hnihah thenin East Jerusalem pawh a awm hran phah dawn a ni.
Tender chhang duhte tan Israel hian October-a an inthlanpui neih hma zawng hun a hawng a, inthlan zawhah tu kaihhruai sorkar pawh lo ding thar se hnawl a harsa zual sauh dawn a ni.
West Bank-a awmna tur siam hi khawvel dan ang chuan theih loh a ni.
Israel hian Palestinian-ten 1967 Middle East indo a chhuah atanga ram an neih ve an beiseiah Gaza nena an ram atana an duh, West Bank leh East Jerusalem-ah hian awmna hmun 160 siamin Juda 7,00,000 vel an cheng mek a. Palestinian maktaduai 3.3 vel an awm ve bawk nia ngaih a ni.
Khawvelin duh lovin dem hle mah se Israeli sorkar ding apiangin luah belh tumin hma an la zel a ni.
Kum 2022 tawp lama Prime Minister Benjamin Netanyahu-a’n thuneihna a chan hnuah phei chuan an luah zau chak zual a, a sorkara a thawhpui zingah hian Juda nihna la vawng leh heng lai ram luah duhtu an awm nual a. Hamas-in October 7, 2023-a Israel beia indona a chhuah hnuah an luah zau chak lehzual bawk.
Ram dangten an thlawp loh em avangin Israel hian kum eng emaw zat chu E1-a awmna tur sak hi a lo ti lo ve tawh thin tho bawk.
An thawhpui tam tak leh Palestinian-te chuan ram pahnih dintir beiseina titawptu leh West Bank then darhna tur tiin an sawi thin a, an duh lo va; mahse, kum khat kal ta atang khan Israeli sorkar chuan E1-a awmna tur sak hi Palestinian-te ram dinna tur ‘tihbona tur’ tiin a kalpui thar lehzual ta a ni.
Israeli court-ah heng lai luahtu, Bedouin Palestinian-te leh Israel-a pawl tam takin khing mah se housing ministry chuan nikum August thlaa sorkarin in 3,401 sak tur a lo pawm tawha in 1,234 satu tur zawnna tender a chhuah ta a ni.
Inte hi sq km 12-a zau, East Jerusalem leh Maale Adumim inkara sak tur a ni a. Finance Minister Bezalel Smotrich-a chuan Palestinian-te ram siam tumna chu ‘nawh reh tur’ a ti a ni.
Tender hi October 19 thleng chhan theih a ni dawn a, October 27-ah an inthlang zui dawn a. Sorkar thar din hmain tuna sorkarin a satute nen inremna an ziak hman dawn a, sorkar thar a ding tan thiah leh a harsa sauh dawn a ni.
Israel hian East Jerusalem telin West Bank hi 1967 Middle East War-ah khan Jordan hnen atangin a la a. East Jerusalem hi kum 1980 khan an taah an chhal tan a, khawvel ram tam zawkin an pawmpui lo thung.