An ram enthlaa puhin Russia-in British palai hnawt chhuak

An ram enthlaa puhin Russia-in British palai hnawt chhuak
Ram pahnih inkar chhe mek karah Thawhlehni khan Russia chuan British palai chu ram enthlaa puhin an hnawt chhuak tih a puang.
FSB security service chuan palai, TV news-a nasa taka tihlan thin hi an rama a luh dawnin thu dik tawk lo a behchhan niin an sawi.
“Hetih rual vek hian Russian FSB chuan Russia ram himna tiderthawng thei thila a chetna an hmu chhuak bawk,” tiin thuchhuah an siam.
Britain-a Foreign, Commonwealth & Development Office chuan engmah a la sawi lo va. Moscow-a British embassy pawhin a la sawi lo bawk.
TASS news agency chuan Russian Foreign Ministry thupuangtu, Maria Zakharova-i chuan ministry-in British ambassador chu a ko tawh niin a puang tih an sawi a, hei hi ram leh ram inkara lungawi lohna lantirna lian tak a tling.
FSB chuan tuna an hnawh chhuahj tak hi kumin kum tir lama an ram enthlaa an puh avanga UK palai paruk an hnawh chhuah aiawhtu zinga mi niin an sawi.
Ukraine-a indona a chhuah hnuah Britain leh Russia inkar hian Cold War hnua a hniam lam ber a tawng mek a. Britain hian Russia hi nasa taka hrekin Ukraine hnenah ralthuam a pe nasa em em thung.
Russia chuan Ukraine hian British Storm Shadow cruise missile chu kar hmasa khan a vawi khat nan an ram chhungah an kap lut niin a sawi nghe nghe a. President Vladimir Putin-a chuan Kyiv-in he missile leh US ATACMS ballistic missile an kah avang hian Russia-in a chhan let nan hypersonic missile thar hmangin Ukrainian khawpui, Dnipro chu November 21 khan a kah ve phah niin a sawi nghe nghe.