ITI Aizawl-in kum 60 tlin a lawm

Industrial Training Institute (ITI) chuan an kum 60 tlin, Diamond Jubilee chu Ningani khan an lawm.
Hmanpuitu Labour Employment, Skill Development & Entrepreneurship minister Lalnghinglova Hmar chuan sawrkar kumah kum 60 chu pension a, hahchawlhna hun atana hman a nih tawh laiin, ITI erawh Diamond jubilee an thleng chu hmasawn zelna atana chona ni turin a duh tih a sawi a. ITI-a inzirte chu an training chhuah hnuah pawh inzir chu duhtawk mai loa, mahnia inzir chhunzawm zel a, khawvel thangzelah hnuchhawna an awm loh nan an themthiamna chu tunlai khawvel mila tuaihriam ve zel turin a fuih a ni.
Jubilee pual hian essay inziahsiak leh hla inphuahsiak buatsaih a ni a, lawmman hi sem a ni. On the Job Training Certificate (Hyundai Motor India Ltd & Surveyor) leh Atal Incubation Centre, SELCO Foundation certificate dawngte hlan an ni bawk.
ITI Aizawl hi kum 1964-a din a ni a, tunah hian thawktu principal 1, vice principal 1, supervisor (ic) 1, instructional staff 28, non-teching staff 13 an awm. Engineering trade 14, non-engineering trade 5, a vaiin trade 19-ah thiamna chi hrang hrang zir theih 23 a awm a ni. Training lai mipa 334 leh hmeichhia 86, an vaiin 420 an awm. ITI industry partner chu Hyundai, Tata a ni.
Din a nih tirh, kum 1964 atanga kumin inkarah Govt. ITI a zir tura inziaklut tawh hi an vaiin mi 5825 an ni a, 4767 (82%) chu tha takin an zir chhuak a ni. ITI hnuaia zirchhuakte hi National Council for Vocational Training-in National Trade Certificate a pe thin a. Hei hi cetral/ state/UT te recognized certificate a ni. ITI Aizawl bik hian tunah 6.4 grade a nei mek a ni