Jail tâng chhuak leh Synod

Jail tang chhuak, haw-na tur nei lo, khawlaia tal mai maite enkawlna Chite Venga ‘Khawngaihna In’ beltu jail tang chhuak an thathnem tak em avangin a hmunhmain a zo tawh lo va; Khawngaihna In nena thawk dun Synod Prison Ministry chuan, Hlimen hmuna Synod ram chu hman hawh a dilpui angin Synod Executive Committee thukhawm chuan a remti a. Synod hnena Hlimen ram petu hi Pu Vanlalngaia, Kulikawn niin, a ram zau zawng hi bigha 7.5 (metre 130 vel bial) zeta zau a ni.
Mimalin Synod hnenah ram a pe a, Synod chuan mi chanhaite awmna turin a thehchhuak ve leh a, taksa leh thlarau chhanchhuah ngaite tana Synod hmalakna peng thar pawimawh tak hi, ‘Synod tih awm rêng a ni’ tia sawi a inhmeh hle a ni.
Ram hi ‘hman hawh’ tih a la ni deuh mai a; mamawhna zawn thlir chuan, Khawngaihna In awmna nghet atan ruahman zui ni thei se a duhawm hle awm e.
Mizoram, ram zim tê, mihring tlem tê awmnaah hian Kristian kohhran (denomination) a tam hle a. Heng kohhran hrang hrangte hna pui ber chu, Lal Isuan vana a lawn dawna thupek hnuhnung a hnutchhiah, ‘Chanchin |ha hril’ hi a ni. Chu Chanchin |ha hril hna chu thawkin ram dangah missionary tam tak tirhchhuah a ni a, kohhran tihawm tak pawh a ni e.
State pawn lama missionary tam tak tirhchhuah a nih mek lai hian, a tirchhuaktute awmna ber Mizoram chhungah chuan sualna hrang hrangin bu a khuar nghet tawh hle a; a chhe lama ‘ber’ hauhna kan ngah tawh hle a nih hi! A chhe lama kan lansarhnate hi—HIV/AIDS, Drugs, zuk leh hmuam (vaihlo), Cancer, eirukna, rukruk, dan kalha sumdawnna etc..
Chanchin tha la hre lote puala missionary kan tirhchhuah nasat em em laiin, Mizoramah hian Chanchin tha hre tawh, mahse sual rah hrang hrangin a bawh buai mek hi kan tam hle mai a. Mizoram hi kohhran hrang hrangte rawngbawlna tur ‘field’ zau tak a lo chang ta a ni ber awm e.
Rin thuhmun, tum thuhmun, heti tak maia kan inthen darh nasa hi chu, ‘thing tang mal’ leh ‘thing tang telkhawm’ tehkhinna thufinga ‘thing tang mal tan’ kha kan ang viau mai awm e. Kristaa pumkhat inti si, inpumkhat zawnga hma la thei si lo te pawh kan ni awm e. Thing tang telkhawm ang khan intel khawm thei ila chuan, rawngbawl hna hi kan thawk sawt duak duakin a rinawm.
Kan ram dinhmun han thlir chian hi chuan, chhan a ngai ngawih ngawih a, sawrkar thachakna ringawt hi chu a tawk zo tawh lo; mi tin hi mahni theihna zawn theuhah thahnemngai taka ram hmangaihna (patriotism) rilru pu chunga kan pen chhuah hi a tul takzet tawh a ni.