February 3, Zirtawp zing khan NBA regular season khel chhunzawm a ni a. Inkhel hmuhnawm takah Los Angeles Lakers chuan point khatin Indian Pacers an hneh hram. Pacers an hneh tum hian LeBorn James chuan point 26 a thawkchhuak a. NBA a pont thawkchhuak hnem ber record siam turin James hian point 63 chiah a mamawh tawh a, record thar siam turin hma lam a pan zel. Inkhel dangah Denven Nuggets chuan champion lai Golden State Warriors an hneh ve bawk.
-- Advertisement --
Season kal meka khel tha lo, LA Lakers hian zirtawp zinga an khingpui Indian Pacers lakah bul an tan tha lo va, quarter hmasa pahnihah hnufual zawk an ni ve ve. Point 13 ngawta hnufual zawk ni chungin chawlhlawk an hmang a, an tlawm leh nge nge tura ngaih an i hman.
Chawlhlawk thlengin hnufual zawk ni mahse chawlhlawk hnu lamah LA Lakers hi an insiamtha a, an khingpuite an um char char. Quarter thumnaah point khata chungnung hramin an khingpuite nen an inkar an tizim phawt a. Quarter hnuhnung berah tha leh zual zawka inlan in, point 13 ngawtin an chungnung zui leh ta mai a. Point belhkhawmah point khata chung nung zawkin hnehna pawimawh tak an chang.
Tarlan tawh angin vaneihthlak taka Indian Pacers an hneh tum hian LA Lakers tan LeBron James chuan point 26 a thawkchhuak. James hian NBA a point thawkchhuak hnem ber ni turin hma lam a pan zel a. NBA a point thawkchhuak hnem ber ni mek; Kareem Abdul-Jabbar record khum turin James hian point 63 chiah a mamawh tawh a. Record thar kan hmuh thuai a rinawm.
Zirtawp zingah inkhel dangah Nuggets chuan point 134-117 in Golden State Warriors an hneh.