Jammu-ah ni tin vawi 120 vel firfiak beihpui thlak thin
Jammu-ah ni tin vawi 120 vel firfiak beihpui thlak thin
Jammu & Kashmir-a Jammu ram bial chhungah ni tin firfiak lakah vawi 120 vel beihpui thlak ziah ang a ni a, tun hnai kum eng emaw ti zat chhunga firfiakna laka a zalen tawh viau hnuah a ralti thar leh hle.
Police chuan Jammu-a ram dang firfiak awmte chu himna tiderthawngtu lian tak a ni tih an sawi a. An laka beihpui thlakin inrin lawk loh deuh deuh lai pawha chet chhuah a ngaih reng thu an sawi.
“Ni tin vawi 120 vel firfiakte bei hian thawh chhuah a ni a. Ni tin tih dan piah lamah thu dawn bawhzuia chet chhuah a tam a, tih zel pawh a la ni ang,” tiin Jammu police chief Bhim Sen Tuti chuan a sawi.
Tuti-a hian venhim hna thawktuten thawhrimna zarah Jammu tlang sang lama ram dang mi firfiak awmte chu thah chimih an nih ngei tur thu a sawi a. “Ram ng mite hi kum hnih chuang liam ta atangin himna tiderthawngtu lian ber an ni a. An laka beihpui thlakna leh ramri venna pawh tihchak zual a ni,” a ti.
Jammu hi kum li liam ta vel atang khan firfiakten awm nan an hmang nasa a. Ram dang mi tam tak chu ramngaw hmun hrang hrangah an biru thin.
Heng mite hian sipai bakah civil mite pawh an bei thin a, heng mi an beih apiang hian an tlanchhe hman deuh ziah bawk.
Jammu-a firfiak chetna lian hmasa ber chu October, 2021 khan niin Surankote, Poonch district-ah sipai an bei a. Hemi hnuah hian sipai leh civil mi an bei zui zeuh zeuh va. Ralthuam pawh US siam M4 carbine leh inbiakpawhna tha tak tak thlengin an nei a ni.
Sipai tam zawk dah belh ni thin mah se Jammu hi tlang chhengchhia leh kawr ruam thuk tak tak bakah ramngaw chhah tak tak tamna a nih avangin firfiakte hi hai chhuah vek theih an ni bik lo.
Thuneitute chuan ni tin miin hmun hrang hranga rinhlelhawm an hmuh thu an thlen thin tih an sawi a. Venhim hna thawktute che chhuak zui vat thin mah se firfiakte hi dap chhuah hleih theih an ni meuh lo.
Firfiak beih kawnga mi thiamte chuan hetianga zing beihpui thlak hi venhimna tihthatna a ni ngawt lo va, thu rintlak dawn loh vang mai a ni thei tih an sawi a. Ni tin vawi 120 an thawh chhuah chuan thla khatah pawh vawi 3600 tlingin kum khatah phei chuan vawi 44,000 chuan beihpui an thlak tihna a ni.
Kum 2021 thleng khan Jammu hi mi firfiakten an tibuai lo hle thin a, Kashmir Valley-ah vek an che thin a. Valley-ah pawh la awm zel mah se Jammu tlangramah hian an huang an zauh ve ta a ni.