January-ah malaria vei 135

Kumin January ah Lunglei district-ah malaria vei 135 hmuhchhuah an ni.
Lunglei District Task Force for Elimination of Malaria chu Ningani khan an chairman, bawrhsap Ramdinliani kaihhruaiin an thukhawm a. Report-a a lan danin, Lunglei district-ah nikum, 2022 khan thisen 36551 endik atangin malaria vei 2890 hmuhchhuah an ni a, an zinga 2356 chu Malaria Pf niin, 534 chu Malaria Pv an ni. Nikum chhung vek khan Malaria vanga nunna chan mi pahnih awmin, February leh June a boral an ni a; Lungsen PHC leh Tlabung SDH huamchhunga cheng te an ni.
Lunglei district-ah Bunghmun, Lungsen leh Tlabung huamchhungah malaria vei hmuhchhuah a tam bik a. January 2023 chhung khan Lunglei district-ah malaria case hmuhchhuah 135 a awm a ni.
Dengue leh Chikungunya natna darh chungchanga district dinhmun pawh report a ni a. Nikum khan sample test 754 atangin Dengue 61 hmuhchhuah niin, hemi chhung vek hian sample 132 test-ah Chikungunya 34 hmuhchhuah a ni. Heng natna kai hmuhchhuah zingah na tak (severe case) an la awm lo tih sawi a ni.
Thutkhawmah hian malaria umbo tura sawrkar hmalakna kal mek leh chak zawka line department leh pawl hrang hrangte nena tanruala hma lak ho theih dan tur sawi a ni a. Bawrhsap chuan Lunglei district chu Mizorama malaria tamna ber pahnihna a ni chu pawi a tih thu sawiin, line department-te chu tangruala mahni zawn theuha mawhphurhna tha taka hlenchhuak turin a chah.