Japan lam hawia insumdawn tawn dan sawinaah LESDE minister tel

Shillong Meghalaya-ah ‘India Japan Intellectual Conclave’ neih a ni a, Mizoram LESDE minister Lalnghinglova Hmar pawh telin thu a sawi.
Conclave thupui chu ‘North East India, Bangladesh and the Bay of Bengal in the Indo-Pacific: The Way Forward’ tih a ni a. Ministry of External Affairs, Embassy of Japan leh North Eastern Council buatsaih a ni. MP leh minister bakah India, Bangladesh leh Japan atangin ambassador, high commissioner leh company hotute an tel. Heng ram pathum insumdawn tawnna lam hawi sawiho a ni a;
LESDE minister chuan mithiamte thusawinaah India, Japan leh Bangladesh insumdawn tawnna a len tur thu leh chumi kawngah chuan hmarchhak state-te an pawimawh thu a sawi a. Mizoram pawimawhna pawh sawiin, he insumdawn tawnna lian takah hian Mizoram hian tel ve a duh mai niloin, hmun pawimawh tak chan a duh tih a sawi. Tlin tawk a la sang lo a nih pawhin, Mizoram sawrkar chuan hemi kawnga hmalakna awmte chhunzawm a, a hma aia chak zawka kalpui a tum tih a sawi a ni.
Mizo thalaite Japan-a hna thawk tura an kalchhuah mek thu leh Mizoram sawrkarin hei hi lianthama kalpui an tum mek tih a sawi a. Hemi kawnga thawhpui turin sawrkar laipui aiawh, state sawrkar aiawh leh company hotute a sawm nghal a ni.
Conclave-ah hian khawvel insumdawn tawnna kawnga India-in khawchhak lam hawi a tum dan, Japan-in investment liantham a kalpui dan, India hmarchhak state-te he hmasawnnaah hian an tel dante sawi a ni a; thawhho zel dan leh inpuih tawn dan zirho a ni.