Jung Kook surprise Times Square show

BTS member Jung Kook chuan a solo album thar ‘Golden’ a tlangzarh hlim hlawt a, a lawm nan fans special treat atan New York City-a Times Square-ah surprise performance a nei. Jung Kook hi TSX Entertainment stage-ah inlanin, Calvin Klein thawmhnaw hain, a album thar ‘Golden’-a hla hrang hrang a perform a ni.
TSX Entertainment co-CEO Nick Holmsten chuan thuchhuah siamin, “Jung Kook leh BTS group tan he hun chhinchhiah tlak tak mai kan buatsaih thei hi kan lawm hle a ni. A solo zinkawngah hian chart-a a chungnung ber luah thei hla nei nualin history a siam tawh a, he album pawh hi a lar chhunzawm zel ang tih kan ring nghet tlat a ni. Hei hian rimawi kalkawngah pawimawh tak a nei a, a bik takin K-Pop fans bakah Times Square leh New York City tan pawh a pawimawh a ni,” a ti.
Golden album hi November ni 3-a a tlangzarh kha niin, he album-ah hian a hla Billboard Hot 100 chart-a No.1 kai thei ‘Seven’ featuring Latto bakah Jack Harlow nena an thawh dunna ‘3D’ pawh a dah tel a, he album-a a hla chuam erawh ‘Standing Next to You’ niin, live-a perform pawh a chak tawh hle niin Apple Music Zane Lowe interview-ah a sawi nghe nghe a ni.