Juventus an tla ve leh

Thawhleh zanah Champions League last 16 lut zo lova Inter Milan an tlak hnuin nilai zanah Juventus an tla zui ve leh. Juventus hian an mualah hnehna chang bawk mah se goal hnih an chhuah a, Galatasaray paltlang zo lovin an tlak phah.
Italian club lian Juventus hi Turkish club lian Galatasaray mualah 5-2 in an lo tlawm tawh a, an muala inkhel leh tur ni bawk mah se an dinhmun a chhe sa hle. Dinhmun chhe takah ding bawk mah se hnehna chan let ngei tumin an mualah tan an khawh a, khelh pawh an khel tha hle. Hun pangngaiah 3-0 in hma an hruai a, an si phurh an sut zo. Minute 90 chhungin khel tha viau mah se extratime-ah an tlo zo lova, tlem zawk an ni reng bawk nen goal hnih an chhuah a, last 16 lut zo lovin an tlak phah ta hial a ni.
Champions League-a vawi hnih champion tawh Juventus hian an mualah khel tha viau mah se goal erawh an thun thei mai bik lo. An hun tha neih an hlah fo hnuin penalty an hlawhchhuah. Penalty hi Manuel Locatelli chuan minute 37-naah awlsam takin a pet goal a, hmahruaina goal a thun. Locatelli goal thun hmang hian Juventus in 1-0 a hmahruai chungin chawlhlawk an hmang.
Second half tantirh lamah Juventus tan thil duhawm lo tak a thleng a, Lloyd Kelly chu minute 49-na lekah hnawhchhuah a ni. Si hnih phur chunga thlem zawk nih leh bawk chu Juventus tan thil tha lo tak a ni a, phuar beh ang hial nih theihna a ni. Tlem zawk ni mah se an mualah an khel tha zui viau thung a, goal hnih an thun zui leh ta hial bawk.
Goal thun mamawh Juventus tan hian Federico Gatti chuan minute 70-naah an goal hnihna a thun a, tlem zawk an nih vanga ngui hman Juventus player te an harh thar leh. An si phurh sut zawh ngei tuma tan an khawh chiam hnuin Weston McKennie chuan minute 82-naah an goal thumna a thun leh ta mai a, an si phurh an sut zo ta nge nge.
5-5 a inhnehtawk a, chak tur zawk a chian loh thar leh hnuin Juventus in goal thun belh theihna hun remchang tha zet mai an nei a, uiawm takin an hlah tak thung. Hun pangngaiah chak zawk an awm theih loh hnuin extratime-ah Galatasaray an khel tha a, tam zawk an nihna chhawr tangkaiin goal hnih an thun.
Turkish club lian Galatasaray tan hian Napoli atanga loan a khel mek Victor Osimhen chuan minute 105-naah goal thunin si bekhkhawma hma an hruai letna goal a thun. Tlem zawk ni chunga goal an chhuah vangin Juventus an chet a har leh zual a, an hnual tak zet tawh. Juventus an hnual viau laiin Galatasaray an phur ve viau thung a, Baris Alper Yilmaz chuan minute 119-naah an goal hnihna a thun zui leh a, an chakna a nemnghet.
Galatasaray hian Italian club lian Juventus chu si belhkhawmah 7-5 ngawtin hnehna an chang a. Inlehthalna lian thlentirin last 16 an lut a, an club chanchina hnuhma tha leh ropui an hnutchhah.