Juventus hremna hlip leh rih

Juventus hremna hlip leh rih
Transfer chungchanga felhlel awm avanga point 15 an paihsak tawh chu Italy rama sporting court sang ber Olympic Committee tribunal-in ennawn leh tur a tih avangin Juventus laka point paihsak hremna na tak hi hlihsak an ni leh ta rih a, heti a nih takah chuan Serie A table-ah point 59 neiin pathumna an luah chho leh ta rih.
Kumin January thla khan Turin club hi player leina sum chungchanga dan an bawhchhiat avangin point 15 zet paihsak niin, table-ah pawh an hniam thla rawih rawih a, mahse, Juventus an puhna leh hremna hi court-in ennawn leh tura a tih tak avangin pasarihna atangin top three an luah chho leh a; thiam an chang tihna erawh a la ni chuang lo a, an chungchang hi ngaihtuah nawn leh tur a ni a, hremna hi a ngai anga kaltir leh pawh a la ni mai thei!
Juve case-ah hian an sporting director hlui Fabio Paratici pawh thla 30 chhung atan hremna pek a ni a, a khinletna hi hnawl a lo ni tawh nghe nghe.
Paratici bakah hian Juventus president hlui Andrea Agnelli, ex-chief executive Maurizio Arrivabene leh sports director Federico Cherubini-te khinletna pawh hnawlsak a ni a, chutih laiin an player leh director hlui Pavel Nedved bakah Paolo Garimberti leh Enrico Vellano-te ‘appeal’ thehluh erawh pawmsak a ni thung.
Hremna an lo pek tawh ennawn a nih leh dawn takah chuan Juve case hi hremna lo pe tawhtu Italian Football Federation appeals court-in a ngaihtuah tha leh dawn a ni.
Serie A season kal laiah game riat khelh tur la awmin, point 15 paih tawh peklet leh an nih rih avangin Juventus chuan Champions League khelh phakna hmuna awm tawh AC Milan an nekchhuak a, Milan hi panganaah awmin, AS Roma erawh top four-ah an la inhamtang a, palinaah an chhuk thung.
Juventus chief football officer Francesco Calvo chuan hremna hlihsak leh an ni chu lawmawm a tih thu sawi chungin an point neihlet leh chu an chang hlen dawn tih a sawi.
Old Lady point 15 zet an paihsak chhan kha kan la hre furin a rinawm a: Italian football governing body (FIGC) chuan kum 2019 – 2021 chhunga an club transfer kalpui dan an chhui a, kumin January thla khan an sum hman theih zat aia tam hmang leh an sum chetvel dan thup thena puh an nih avangin point paihsak hremna sang tak pek an ni.
Club lam chuan tihsual an neih loh thu sawiin, an case pawh Italy rama sports huanga court sang ber Olympic Committee tribunal lamah an thlen a, he tribunal hian hremna chu a nghetin a hnawlsak lo a, mahse, club leh an director rual laka hremna a lo pek tawh chu zirchiang nawn leh turin thupek a chhuah a, thutlukna thar siam a nih hma atan FIGC lamin point an lo paihsak tawh kha a ngai angin a kal leh rih mai a ni.
Juventus hi club licensing leh financial fair play regulations bawhchhiaa puh ni bawkin, he thu hi thla hmasa mai khan puan a ni a, Uefa lam atangin chhui an hmabak mek bawk.