Nadal-a kir hun la chiang lo

Nadal-a kir hun la chiang lo
French Open title 14 tehreng hui tling tawh Rafael Nadal chuan tunhnaiah a dinhmun tharlam tarchhuakin, a kir theih hun tur a la hre thei lo tih a sawi!
Spaniard hi hliamin a tlakbuak rei ta viau a, a khel bawr hliam avanga a chawlh rei hun chhung tur pawh chawlhkar riat lai tling tura ngaih a ni a, kumin January ni 18 atang khan inelna a la hmachhawn leh ta lo vang vang a, April ni 25 atanga khelh tan tur Madrid Open-a a inlan loh tur thu pawh nem-nghet tawhin, May thla French Open-ah pawh a tel thei dawn em tih a la chiang lo zui zel.
Kum 36 mi Nadal chuan a dinhmun sawiin, “Ka hliam hi a la dam lo a, competitive hma-chhawn leh tura inbuat-saihna pawh duhthusama kalpui theih a la ni lo. Training chu tan ve leh tawh bawk mah ila ni tlemte liamtaah khan ka hawi lam ka herdanglam leh ta rih a, treatment tharte ka han la leh rih a, hma ka sawn a nih chuan eng lam nge ka hawi chhoh ang tih ka la ngaih-tuah chauh dawn a ni.
“Tun dinhmunah chuan khelmuala ka kir theih hun tur chungchangah deadline mumal tak ka la siam thei lo a, a chhan pawh ka dinhmun hi ka sawichian mai theih bik loh vang a ni. Hei hi ka hun tawn mek chu a ni rih e,” tiin social media lamah a dinhmun tharlam a tarchhuak.
Nikuma a French Open title 14-na hlawh-chhuak Nadal hi kumin January thla Australian Open second round-a a chak loh hnu khan a khel veilam tihrawl a thler tih hmuhchhuah niin, tun thlengin khelmualah a la kir thei ta lo a ni.
Grand Slam title 22 la tling tawh Spaniard chuan sawibelhin, “Tun dinhmunah duhthlan tur tehchiam ka nei thei rih lo a, he hun harsain min tlakbuak laia a eng lam zawnga thlir mai loh chu tih theih ka nei lo. Clay season hnukhawi lamah tal hian tournament pakhat tal chu khelh hman ka duh khawp mai a, mahse, ngaiawh leh tura theihtawp chhuah leh rilru pau-khauh tak put bak chu duhthlan tur kawng dang ka nei rih lo,” a ti.
Nadal-a ropuina French Open hi thlathar May ni 28 atanga khelh tan tur a ni.
Hetih lai hian Olym-pic champion Belinda Bencic pawhin a khel bawr nuam lo avang bawkin Madrid leh Rome khawpuia clay tournament a khelh theih loh tur thu a nemnghet ve tawh bawk.
Swiss nula hian Char-leston Open final hialte kha thleng bawk mah se United States lama WTA Tour a kal chhung zawng khan a nuam lo tawh tih a sawi.
Bencic hian Madrid leh Rome khaw lama French Open inbuatsaih-na tournament lian pa-hnih a hawisan tak chhan sawifiahin, Ro-land Garros lama 100% fit neih hman a beisei vang a nih thu a sawi.