K Vena’n chairman remti lo chung Manipur chungchang sawi
Parliament monsoon session neih mekah Nilaini khan Rajya Sabha-ah Mizoram MP K Vanlalvena’n chairman remti lo chung Manipur buaina chungchang a sawi ri a, chairman hian a thuttir. Ro an rel chhunzawm hlei thei lo. K Vena hian Thawhlehni khan Manipur chungchang sawi turin adjournment motion putluh phalna a dil a, Nilaini atan a dil a ni. Chumi bawhzui chuan Nilaini hian chairman hmaah a au a, mahse phalsak a ni lo.
Rajya Sabha rorel inkhawm hi dar 11-ah an tan a, business list te chhiar zawhah chairman-in adjournment motion putluh diltu mi 42-te hming leh short discussion neih diltu mi pasarihte hming a chhiar. Mi 42-te hi opposition member vek an ni a, mi pasarih hi NDA member vek an ni. An vai hian Manipur chungchang sawi dil vek an ni a, mi 42 leh mi pasarihte zingah hian K Vanlalvena a tel ve ve.
Chairman-in an hming a chhiar lai hian member-te an lo bengchheng tawh a, an inau tawn viau tawh. A chhiar zo tihah K Vena’n a thutna atanga thovin chairman awmna lam a pan a, Manipur chungchang sawi a dil ta a ni.
“Tlar hnung ber dawttua thu kan ni a, kan awmna a hla si a, ka tho a, chairman hnaiha kal ka tum ta a,” tiin K Vena hian The Aizawl Post a hrilh a, “Manipur-ah kan unaute’n nunna an chan thu te ka sawi a, sawiho a tul thu te ka sawi a, chairman-in thu turin min ti thung a,” a ti.
“|hu turin min ti a, phalna i nei lo min ti a, keiin sawiho a tul thu te ka sawi a,” a ti a, a thut tak thu leh rorel inkhawm an tihtawp thu te, chawhnu lamah an tan leh a, opposition lam an tel duh loh thu te, ani pawh a tel loh thu te a sawi bawk.
Manipur chungchanga short discussion neih diltu MP pasarihte hi hmarchhak MP-te an ni a, NDA lam an ni. Nilaini khan an inhmukhawm a, hetah hian K Vena a tel duh lo tih thu dawn a ni. “Kan sawi tum dan a inang lo a, tel vena turah ka ngai lo,” a ti.
K vena hian kar hmasa Zirtawpni khan Thawhtanni-a Manipur buaina chungchang sawiho dilin adjournment motion putluh a dil a, a hlawhtlin loh avangin Thawhtanni hian a tuk atan a dil leh. Thawhlehni-ah a rem loh leh avangin Nilaini atan a dil leh a, Nilaini-ah a rem loh avangin Ningani atan a dil leh nghal.