Hrangturzo bialtu MLA, minister Lalchamliana chuan a bial atangin zirlai, HSLC leh HSSLC exam-a top 10 thlengte hnena laptop pek a tiam chu a dawng thei tur an la awm rih lo, tiin, top ten thleng thei zirlai neih a chak thu a sawi.
Minister Lalchamliana hian a biala zirlai pass tha te lawmpui hmun hnihah a hmanpui a. MZP Sub Hqrs. E. Lungdar chuan Ningani chhun khan an huamchhunga HSLC 2023 exam-a first division chin chunglam 9 leh HSSLC exam-a first division leh a chunglama pass mi 10 hnenah chawimawina an hlan a. Ningani zan khan MZP Sailulak Branch chuan HSLC pass thar 17, HSSLC pass thar 12, BA pass thar 5 leh B.Sc pass thar 2 hnenah chawimawina an hlan ve thung.
Zirna chu hmasawnna a ni a, mithiam tamna ramah remna leh muanna te, hmalam pan zel tura hriatna leh thiamna a tam thin tih Home minister hian a sawi a. A bial chhungah an theih ang tawkin zirlai tithate hnenah lawmpuina an hlan thin a, kumtin lawmpui tur an nei nual thin chu a lawmawm hle rualin, laptop dawng thei tura top ten ni phak erawh an la awm lo tih sawiin, “Hetiang thleng thei zirlai neih hi ka chak hle a ni,” a ti. Vawiina chawimawina dawn chu a bul tanna ni a, a tawp thlenga an beihzui a tul hle tih a sawi.
Mizoram sawrkarin zirna a ngaihpawimawh avangin zirtirtu indaihlohna phuhru turin zirtirtu thar an la nasa hle tawh tih a sawi a. Zirlaite chu nasa zawka lehkha an zir zel theihna’n an taksa enkawl uluk a, a ti chaklo thei thil lakah inthiarfihlim turin a chah.
Ka bialah HSLC/HSSLC top 10 ni pha zirlai neih ka chak – Lalchamliana
Get real time updates directly on you device, subscribe now.
Prev Post