Lunglei lama ruihhlo do dan tur rel

Mizoram sawrkarin ruihhlo do beihpui a thlakna turah Lunglei district-a hma lak dan tur relin Excise & Narcotics minister Er Lalrinawma hoin thutkhawm a ni.
Sawrkar hmalaknaa ‘Ruihhlo Do’ hnuaia Lunglei district-a beihpui thlakna atan cheng nuai sarih fund ruahman a ni a. He fund hi tangkai thei ang bera hman a nih theihna’n Lunglei District Level Committee on Ruihhlo Do chuan ruahmanna a siam. Middle, high leh higher secondary school 52 zirlaite tan June leh July chhung hian ruihhlo ti lo tura inzirtir a ni anga, zirtirna pe tur MHIP leh Grace Society atangin master trainer thlan tawh an ni.
Excise & Narcotics Department Lunglei District report danin, kumin January atanga May chhungin an district-ah ND&PS Act 1985 (NDPS) case 41 awm tawhin mi 46 man an ni a; hemi hun chhung hian heroin gram 635, ganja gram 597 leh ruihna atana hman damdawi dang te man a ni. Heng case-ah te hian Burma raltlan man an la awmlo na in, case an chhuinaah ruihhlo tawlh lamah raltlan zingah thui taka inrawlh an awm tih an hmuhchhuah thu END hotute hian an sawi a ni.