‘Ka champion a nih chuan kangaroo tattoo’ – Alcaraz

‘Ka champion a nih chuan
kangaroo tattoo’ – Alcaraz
Aussie dream nena Melbourne title beisei leh mek Carlos Alcaraz chuan vawithum a inlan tawha quarter-final a la pelh zawh ngai lohna Australian Open-a a champion chuan a taksaah kangaroo tattoo chhut a tum thu a sawi!
Arualpuite zing atennis star eng berte zinga mi ni mek Spaniard hian Grand Slam khelhna leilung pathumah trophy hawn tawhin, Melbourne Park tournament chiah hi major title a la hawn loh awmchhun niin, tun thla tawp lamah Norman Brookes Challenge Cup a chawi thei a nih chuan kum 21 mi hi Grand Slam title pali la kim vek thei naupangber a ni dawn!
French Open leh Wimbledon champion lai Alcaraz hi 2022 US Open champion ni bawkin, a career la fan thui lo hle mah se leilung hrang thiau pathumah major title a la der tawh a, Australian Open-ah hian a champion leh thei a nih chuan Grans Slam tournament hrang hrang palia champion kim vek thei ‘modern great’ an tih rualkhat – Fred Perry, Don Budge, Rod Laver, Roy Emerson, Andre Agassi, Roger Federer, Rafael Nadal leh Novak Djokovic-te hnung a zui ve thei tawh dawn a ni.
Tarlan tawh angin, Alcaraz hian Melbourne a tlawh tawh vawithumah last eight la pel zo ngai lo mah se chu chuan January ni 12-26 chhunga khelh tur Melbourne tournament liana a beiseina a tihhniam phah lo a, kumin hian a major title la hlawhchhuah zawh loh awmchhun hi vuakchhuah a tum ruh hle a, a hlawhtlin chuan ‘kangaroo tattoo’ nen ngeia lawm a tum thu a sawi!
Spanish outlet Marca-in tunhnaia a tawngkam an tarlan danin, Spaniard chuan, “Ka taksaa kangaroo lem chhutkai ka rilruk mek a; tun dinhmuna ka tum ber chu Melbourne khuaa Grand Slam lak kim a ni,” tiin reh thei tawh lo tura a vuna a mojor title lak tawhte chhutluh chu a tih tum a nih thu a sawi.
Nikum khan Alcaraz hi Jannik Sinner chuan a hliah titih a, Australian Open leh US Open title nen Italian hian season a hmangliam a, kumin Australian Open-ah pawh hian defending champion ni chungin a inlan dawn a, champion tum tana paltlang ngei a nih leh ngei a rinawm.
Paris khaw Olympic final-ah Novak Djokovic hneh loin Alcaraz a tlawm bawk a; US Open second round-a hriat hlawh lo Botic van de Zandschulp a hneh lo ringawtte kha tennis expert-te chuan Alcaraz-a ngheh mar tawk lohna lantirtu niin an sawi.
China Open final-ah erawh a elpui lian ni chho zui zel tura ngaih Sinner a hneh leh lawi a; kha mi hnu khan amah sawiseltute chhangletin, “Player zawng zawngin final thlen kan duh vek a, a nih loh pawhin tournament-ah kan theih anga sang thlen duh vek kan ni.
“Kumin hian ropui taka khelh tournament kan nei nual a, ka tana tournament chhe tak tak pawh a awm ve bawk.
“Ka thawkrim zel dawn a, ka la naupang hle bawk a, ka hma lamah hian kum tamtak ka la inkhelh theih ka beisei a; kum 2025 hian player tha zawk leh nghet mar thei zawk nih ngei ka inbeisei,” a ti.