Kalphung thar hi a tiha tih – Lalsawta

Kalphung thar hi a tiha tih – Lalsawta
Kalphung thar chu a sawia sawi niloin, a tiha tih a ni tih Congress president Lalsawta chuan a sawi.
Zirtawpnia Congress Bhawan-a political session neihah Lalsawta chuan, party pakhatin inthlana sum petute sum la a, vote lo turin an mite an zirtir laiin, an party chuan sum chu la lo a, a pek tumtute pawh vote lo turin an inhrilh thu tih a sawi. “Hei hi kohhran leh Election Commission duh dan a ni. Min tanpuitu chu sum niloin Pathian a ni,” a ti.
Mirethei leh tlachhamte dinhmun siamtha tura an tana thawh chu an mawhphurhna leh an bat, hun lo la awm tura kan thlahte khawvel buatsaih sak chu kan bat a ni a, a tha thei ang berin ram chu kaihhruai tur a ni tih a sawi. “Kan theih bak Pathianin a phut loa, kan theih bakah chuan Pathianin min pui thin. Dik taka kan tih zel chuan mal min sawm zel dawn a. Kan hmalama eng awm hi huaisen leh dik takin pan zel ang u. Ram siam turin Congress party-ah mi tha tak tak an lokal dawn. Kan lama rilru siamfel tawh, khelh fuh leh bawh fuh tum ve lo an lokal dawn. Anni nen he ramah hian danglamna kan thlen tir dawn a ni,” MPCC president hian a ti.
CADC inthlanah seat khat mah la lo tura sawi an nih bakah sum tiamkam leh pek tur nei ve lo chungin seat 4 an la tih sawiin, Congress hmasawnna chu result-ah a hmuh theih tih a sawi. A ni telin Congress hmasawnna India ram pumah a thleng mek tih a sawi bawk
MLA Lalrindika Ralte pawh thu sawiin, an thawhrimna chu Pathian malsawm tlak a ni tur a ni a. An ngaihdan leh suangtuahna chu ram tan, party tana dinchhuahna tlak a ni em, tih chhut ngun a tul tih a sawi. “Sawrkar kan duh, sawrkar kan duh chhan erawh a thianghlim tur a ni. MLA leh minister nih kan tum chhan hi ram tan a ni tur a ni. Thinlung thianghlim leh dik hi Congress party tan chauh a tha lo, ram tan a tha a, a tul,” a ti.