Kalphung thar hi thenkhatin an do – Lalduhoma

ZPM-in a tiam chu kalphung thar chu thenkhat chuan an huphurh em em a, nasa takin an do tih ZPM leader Lalduhoma chuan a sawi.
Nilainia Lawngtlaia ZPM Lawngtlai District Hqrs buatsaih vantlang inkhawmah Lalduhoma chuan an party chu naupangte, tawnhriat ngah lo tak kalkhawm an ni a, thenkhatin beidawng kalkhawm tiin sawi thin mah se, beidawng kalkhawm niloin, beiseina nung neitu kalkhawm an ni zawk tih a sawi. Beidawng kalkhawm tia sawitute chu an beidawng zawk a, an party-ah beisei tur awm si lo, chhuahsan hleithei si loin laklawh takin an awm tih a sawi a ni.
“ZPM hi danglam bik turin kan inzirtir thin a, kan ram leh hnam dinchhuah pui tur chuan kan danglam a ngai. Kan candidate-te pawhin eiru lo turin Val Upa Council hmaah thu kan tiam vek. Kan ram rorelnaa Pathian ram thlentir hi kan tum em avangin thawhrim pawh kan thawkrim a ni,” a ti a. Inthlanah sum sem vang niloin, thawhrimna hmangin chunglam malsawm tlakin hneh an tum tih a sawi.
Pathian zarah an lo sawrkar a nih pawhin, inthlan awm leh tur chu an hnathawh hmanga hneh leh ngei an tum tih ZPM leader hian sawiin, “Sum sem hian kan ram chauh niloin kan rilru sukthlek thlengin a tha lo zawngin a nghawng nasa a, thawhrimna tel loa awlsam taka sum hmuh duhna rilru min neihtir a, kan ram leh hnamin a tuar nasa em em a ni,” a ti.
Sawrkar tha a din theihna turin Pathianin roreltu a ruat thin a, a hriak thih ni lo ten lalna leh thuneihna an chan chuan ramin nasa takin a tuar thin tih a sawi. Ram rorelna sawrkar tha lo nei reng chung si a, biak ina serh leh sang kalpuinaah Pathian a lawm chuang loa, rorelna dik luipui anga luantir chu Pathian thu in a dah pawimawh hmasak a ni tih a sawi.