Kan hmalakna thar hi mipui ti chiaitu ni loin, awlsamna pe tur – Revenue minister

Kan hmalakna thar hi mipui ti
chiaitu ni loin, awlsamna pe tur
– Revenue minister
An department hmalakna thar chu mipui tichiaitu tur a ni loa, awlsam taka ram teh duh ten sawrkar office dawr kher loa rang taka ram an teh theihna tur a ni tih Land Revenue & Settlement minister B Lalchhanzova chuan a sawi.
LR&S department hnuaia service 15 pekchhuahna tura ruahman, e-Ram software chungchanga department thawktute pui tura thlan bik, empanelled firm-te tana hriat tul zirtirin Ningani khan kohkhawm an ni a. Hmanpuitu LR&S minister chuan, ram teh muan lutuk thin avanga mipui harsatna sutkian chu survey firm an rawih chhan a ni a, an ngaihpawimawh ber tur chu mipui harsatna sutkian a ni tih a sawi.
“Kan hmalakna thar hian mipui a ti chiai tur a ni loa, awlsam taka ram teh duh ten rang taka sawrkar office dawr kher loa ram an teh zung zung theih hi sawrkar duh dan a ni,” a ti.
Revenue department chu nasa takin a insiamtha mek tih B Lalchhanzova hian sawiin, Mizoramin SASCI incentive cheng vaibelchhe 15.18 a dawn chu a aia tam zawk hmu turin Revenue office hrang hrangte zan rei tak tak thlenga land record digitisation leh old records scanning an kalpui chuan rah tha a chhuah mek tih a sawi a ni.
Empanelled firm-te chu hlawk tuma firm din an nih rualin, kalsualna lakah fimkhur turin a chah a. Sawrkarin survey hna private firm-te thawh theiha a siam chhan chu mipui harsatna sutkian a nih angin, chumi theihnghilh loa mipui harsatna siam belhtu nilo turin a chah. Thawk tha lo chu a tul anga hremna dan pawh MoU-a ziah sa a ni tih a sawi bawk.
LR&S director R Lalthazuala sawi danin, department ruahman danin January 2025 ah chuan e-ram hmanga online veka application dawn tum a ni tawh a; tuna dilna dawn tawh chu manual-a buaipui a la ni phawt dawn a ni.