Kum 13 leh 15 inkar zingah vaihlo hmang zaa 58 an awm

Mizoramah kum 13 atanga 15 inkar zingah vaihlo atanga siam engemaw ber ti thin za zelah 58 an awm.
National Tobacco Control Programme lam chhinchhiah danin, Mizoram mipui kum 13-15 inkar zingah zuk leh hmuam ti za zela 58, kum 15 chunglam zingah za zela 58.7 an awm a; sim tum za zela 20 ten an sim theih thu a sawi a. Thla khat chhungin vaihlo zial leina atan cheng nuai 918.94 vel sengral zel anga chhut a ni bawk.
Vaihlo leh a kaihhnawihte chu ruihhlo dang tihna tura kailawn langsar tak a nih avangin naupangte ah zuk leh hmuam ti lo tura zirtirna nasa zawka kalpui a tul takzet tih NTCP hotute chuan an sawi.
World No Tobacco Day 2023 pualin Nilaini khan National Tobacco Control Programme, National Health Mission Mizoram hnuaiah State Tobacco Control Cell leh District Tobacco Control Cell buatsaihin Champhai district Buang khuaah vaihlo leh a kaihhnawih laka fihlim tura inzirtirna, ‘Eitur hrisel ching rawh, vaihlo niloin’ (Grow Food, Not Tobacco) tih thupui hmanga neih a ni a, district bawrhsap James Lalrinchhana chuan a hmanpui.
Vaihloin taksaa nghawng thalo a thlen hrang hrangte a lem nena entirin zirtirn an ni a. Vaihlo leh a kaihhnawih khuahkhirhna dan ‘Cigarettes and Other Tobacco Products Act, 2003 (COTPA, 2003)’ chungchang sawifiah a ni. Kumin World No Tobacco Day thupui ‘Eitur hrisel ching rawh, Vaihlo ni loin’ (Grow Food; Not Tobacco) tih leh vaihlo leh a kaihhnawihin hriselna a nghawng dan inhrilh a ni bawk.
World No Tobacco Day pual free clinic buatsaih nghal a ni a. Mi 180 vel inentirin a thlawnin damdawi sem a ni.