Kan Politician-te

By Lalchhandama Colney
Ph – 9862982321
Inthlang ram kan ni miau a, a khat tawka kan inthlan a ngai a ni. Inthlante hi a hautak hle a, chuvang chuan sawrkar ngialnghet kan neih thin te pawh a tha hle awm e. Sawrkar siam thei tur political party-te kan din a, a then te chu an hlawhtling hle a, chan chau tak te pawh an awm ve bawk a, zuihral ta mai pawh an awm thin a ni. Party a din chuan hruaitu tha a pawimawh hle a, chu chuan a dinchhuahpui thei a, a tlakchhiatpui thei bawk a ni. India ram te kan thlir chuan politician ropui leh tha tak tak kan hre nual awm e. Keini ramah hian tute nge han sawi tur kan neih ve aw, Pu Thena, Pu Denga te ho pawh kha tha ve tak an ni. Tun hnu hian tute nge kan ram hruaitu fel leh tha deuh han ti ila, kan sawi chu a inang lo nuaih mai thei. Congress party lam chuan Pu Hawla kha a lo tha ber, an ti ang a, MNF lam ve chuan Pu Zorama tluk an awm lo, an ti ve bawk a. Aw le, eng pawh ni se, kan politician/ram hruaitu hote an tha ve viau alawm maw le, hei bak chu thlan chhuah tur kan nei chuang lo, chantawkah lungawi mai tum ila. Tute Nge In Nih – Kan politician-te tute nge in nih, a then chu lehkhathiam tak tak te, hruaitu nihna nei tha tak tak te, taima tak tak te in ni ang. A thente erawh chu lehkhathiam mang lo, ho ve tak tak, sum erawh duh ve viau kan ni ang. Sawi tawh angin democracy ram kan ni a, ram roreltu tur kan thlang thin a ni. Chungte chu kan politician-te atangin thlan thin a ni deuh ber a, chuvang chuan kan political party, politician hote in pawimawh hle. Vawiinah chuan mi mai mai i ni lo va, mi pawimawh tak i ni, ram i kutah a awm a ni. Zu in ve mai thei i ni emaw kohhran mi tak i ni emaw vawiinah chuan i nihna i inhriat a, i inhmuam up ve viau a ngai a ni. Party policy, manifesto in duan danah ngaihtuahna fim tak put a ngai, a chhan chu ram that leh that loh tur hril theitu in ni. Heta mi ropui ve tak pakhat ai kha chuan party mi leh sa kha chu pawimawh ve tak a ni. Tun hma kha chuan kan politician-te hi mi ho mai mai, kohhran mi tan phei chuan tel ve na chi loha ngaih a ni thin. Tun hnuah chuan kan lo changkang ve tial tial a, a pawimawhna kan lo hre chho zel a, rawngbawlna zahawm tak a ni thei a ni tih, kan lo hre tawh.
Hun Kal Tawh – Kan politician-te hi engnge in lo an ve reng aw, state kan nihna pawh a rei ta vang vang hle mai. Hetih chhunga kan ram enkawltute chu nangmahni hi in ni, tudang mah an ni lo ve. Tunah hian engnge kan ram dinhmun dik tak chu, a tha lutuk kan ti dawn nge aw, min hre chiangtute chuan, sazu eibang a ang, min ti mai lawng maw. Kan duhtawkin kan eiru a, kan inhaivur a, mahni hma sial ranin sum kan sem thin bawk a. Kan ngaihsan zawngte chu sum ngah tak, in leh lo nei ngah te, lirthei chi hrang hrang neite an ni. Mi dik leh rinawmte chuan nuihzat an hlawh a, kan sawi zui hrep mai thin. Rualpawl lo, bengvar lo nih kan hlawhtir thin. Khawtlang leh kohhrana mi challang tak tak te chu a hun leh hmun hria, a tul huna dawt sawi mai thei, Pathian thu pawh sawi leh mai thei an ni. |halaiteah pawh zu leh ruihhlo a hluar a, naupang te tein an thi zawih zawih reng a nih kha. Hruaitu tha chuan kawng dik a zawh ang a, mipuite pawhin an zui mai thin, hengte hi kan hun kal tawh a mi a ni, mahse, thleng nawn thei tho a ni.
A la Tlai Lo Ve – Kan ram dinhmun chu hetiang hi a ni si a, mahse, kan politician-te in la tlai lo ve. Vawiin atanga kan insiamthat a, sum ringawt emaw vote hmuhna tur ringawt emaw kan ngaihtuah loh a, ka ram tan hian engnge ka tih theih tih ringawt kan ngaihtuah chuan, kan la tlai lo ve, kan ram hi chhan tlak a la awm. Tichuan, politician rethei, bengvar lo chu i ni ngei ang, mahse, a tawpah hnehna, chawimawina i dawng dawn, hei hi mi dik leh rinawmte lo chan tawh thin a ni. Nangmah berin sum i it loh a, dikna i kenkawh tlat chuan, a tirah sawisel nuai nuai mah se, a dikna chu mipuite chuan kan ngaisangin kan zui ngei ang. Thil huphurhawm tak ni mah se, tum chuan kawng a awm an tih ang deuh khan, kawng tha ber zawh turin i’n ti ve rawih teh ang, Zoram hruaitu tha ber chu ‘ani hi’ an tih theih turin. Sum hi kan mamawh em em a, a tam thei ang ber kan duh theuh a ni, mahse, Bible chuan, sum tam tak aiin hmingthan hi thlan zawk tur, a ti. Sum te hi chu kan hmang zo leh mai dawn, hmingthanna erawh mi rulruah a riak reng tawh dawn a ni.
Kan politician hote kan han sawi ta malh malh che u a, mipuite pawh hian kan zir ve tho a ngai alawm, in tih ka ring. Nia,a dik viau a, tanrual chu a ngai, mahse, tangrual thei tur chuan hruaitu an pawimawh leh tlat si a ni. Kan politician hote zingah mi tha tak tak, rinawm an tam chuan ram chu a ding kang awk awk tur a ni, sum ngaina mi, fel lo an nih erawh chuan ram chu a chhe deuh deuh dawn a ni. Aw le, kan hma lawkah inthlan a awm dawn, eng ang candidate nge min chhawp chhuahsak dawn, eng policy leh manifesto nge in neih dawn. Ram hruai tha tur candidate, ram siam tha tur policy leh manifesto-te min chhawp chhuahsak thei dawn em? Mipuite duh khawp party kan nih theih nan politician zawng zawngte kan va pawimawh em. Mizo politician-te in duai bik lo, ram intodelh, changkang ni turin Mizoram hi in kutah a awm a, in siam thei a ni.