Modi-an hnung lam enin car khalh ti

Congress leader Rahul Gandhi chuan BJP leh RSS te chuan hma lam hun ‘an thlir thei lo’ tia sawiin Prime Minister Modi chuan Indian car khalhin hnung lam darthlalang chauh thlirin, chuvang chuan ‘accident a tawk awn awn’ tiin a sawi.
Indian Overseas Congress -USA tena Javits Centre a community event an huaihawtah thusawina Gandhi chuan a sawi a, US a tlawhah San Francisco leh Washington DC te pawh a tlawh tel a ni.
“Kan ramah harsatna kan nei a, kan harsatna tawh chu ka hrilh ang che u. BJP leh RSS te hian hma lam hun an thlir thiam lo, an laktlak loh. Eng pawh zawt ula, hun kal tawh an sawi zel ang,” tiin a sawi a.
BJP te hnenah eng vangin nge Rel a chetsual tiin zawt ula, Congress party te vang an ti ang a, kum 50 hma lam an sawi ang, tiin tun hnaia Odisha-a rel accident thleng avangin BJP sorkar chu a sawisel zui a.
Odisha rel accident avangin nunna chan 275 lai awmin rel pathum lai a insu buai a, hei vang hian Railway Minister Ashwini Vaishnaw pawh bang tura nawrna a awm phah reng a ni.
Gandhi chuan textbook atanga periodic table paih chhan BJP te in zawt a nih chuan kum 60 kaltaa Congress thiltih vang an ti zel ang, a ti bawk a.
“An chhanna tur che u chu thlir let ta che u tih a ni mai,” tia sawiin, tumahin hnung lam darthlalang enin car an khalh ngai lo, accident tawh awn awn a ni mai a ti bawk a. “Chutak chu Narendra Modji thil tih mek chu a ni. Indian car a khalh a, hnung lam darthlalang chauh a en bawk si a ni. Eng vangin nge car chu a accident a, hma lam a pan loh a hrethiam lo. Chu tak chu BJP te leh RSS te idea dik tak chu a ni,” tin a sawi bawk a.
“Ngai thla u la, an minister te thusawi ngaithla ula, Prime Minister thusawi ngaithla ula, hma lam hun chungchang an sawi in hre ngai lovang. Tun hma chungchang hlir an sawi ang a, tun hma thil thlengah tu emaw dem tur an zawng zel ang,” tiin a sawi bawk.
Congress hun laia rel a chetsualin ‘Rel chetsual chhan hi British te vang a ni kan ti ngai lo. Congress minister te chuan rel chesual hi ka thiam loh leh mawhphurhna a ni tiin ka bang ang e an ti mai’ tiin Gandhi chuan a sawi bawk a.
India rama inbeihna chu ideology pahnih a lehlamah Mahatma Gandhi ideology leh a lehlamah Nathuram Godse ideology inbeihna ni mek a ni a ti bawk a.
“Kan ramah inbeihna a thleng mek a – ideology pahnih inbeihna a ni a. Pakhat chu BJP leh RSS te kalpui a ni a. Sawi dan awlsam berah chuan Mahatma Gandhi lehlamah, a lehlamah Nathuram Godse a tih theih” tiin kum 52-a upa Congress president hlui chuan a sawi bawk.
Mahatma Gandhi chungchang sawiin Congress leader chuan lehlamah ‘Mihuaisen’ nangmahni ang bawk NRI (Non-Residence Indian) a ni a ti a. Kum tam tak chhunga India in NRI a neih nghawng nei na ber a ni a. Mi inngaitlawm, thuhnuairawlh bawk si, hma lam huna rinna nghat leh India-a rinna nghat a, tharum thawhna hnawla thudik zawng a ni a, chu ideology ngei chu kan zui a ni a. Chu ideology chu he room chhunga awm tin tena inzui mek a ni, tiin Gandhi chuan a sawi bawk.
“A lehlamah Nathuram Godse, thinrim, tharumthawh, a nuna thil thleng dik tak pawh hmachhawn ngam lo a awm bawk a. Gandhi a kahna chhan kha ama nun pawh a hmachhawn ngam loh vang a ni. Chuvangin a thinrimna chu midangah hrikthlak a tum a, a thinrimna hmangin India nihna diktak aiawhtu chu a tihlum ta a ni,” tiin Gandhi chuan a sawi bawk a.
Gandhi chu rilru inhawng leh tunlai a ni a, Godse chu tun hmaa buai tiin a sawi bawk a.
“A thirnim a, huatnain a khat a, a tak takah chuan hlauhthawnnain a khat a ni. A thinlung chhungril berah chuan mi dawihzep a ni,” tiin Rahul Gandhi chuan a sawi bawk a, India in harsatna a tawh mek chu ‘kan rama democratic structure-in beih a tawk’ a ti bawk a.
“Kan institution ten nasa taka beih a tawk mek a, kan judiciary leh media ten beih an tawk a, idea of India humhim hi in mawhphurhna a ni” tiin Gandhi chuan a sawi bawk a. “Kan idea lailum chu kan Constitution leh democracy hi a ni a. Modern India chu kan Constitution leh democracy tel lovin a awm thei lo” tiin a sawi bawk.
Gandhi chuan public meeting a neihah te mi tam tak idea of India a rinna nghat a, constitution a democractic principle duh an awm a ti a, “Kan ingainain kan inhmangaih tur a ni,” tiin a sawi bawk.
Gandhi chuan India ramah chuan “Chhuanlam kan siam a, thil nihna dik tak kan pawm lo mek. Unemployment a nasa em em a, kan thalai ten hna an neih a ngai a ni,” a ti bawk a. “Heta ka lo kal chhan chu thalai hna nei lo tam tak awmna India ram kan siam tha dawn a nih chuan India leh united States-ah leihlawn kan dawh a ngai a ni. Kan thawh dunna tur eng nge ni ang a, engtiangin nge China-in harsatna a siam te kan hmachhawn ang tihte chu kan ngaihtuah ho tur a ni,” tiin a sawi bawk.
“Ka puihna mamawh u la, eng sakhua bia nge i nih ka ngaihtuah lo. Indian ka ni a, ka pui mai dawn che a ni. Midangte laka invaivung, inlak eng emaw leh tharum hman hi Indian values a ni lo. Indian values a ni lo tak zet a, Indian values ni se chuan Mahatma Gandhi, Guru Nanak leh Ambedkar te kan ngaisang nang,” tiin a sawi bawk.
India ramah chin dan thar a awm mek a, Indian nih chuan huatna neih tur tih te, midang te tihhrep hrep tur tih te a awm mek a ti a, chung te chu Indian nihna a ni lo, chu chu kan pawm duh loh leh kan hnawl zawk a ni, tiin Gandhi chuan a sawi bawk.
“Hnung lam darthlalang en ka tui ve lo va, hma lam ena unau te u tih ka duh zawk a, ram angin engtiangin nge hmangaihna leh ngainatna lantira hma kan sawn ang tih sawi ka duh zawk a, chu chu ka duh dan leh tuina a ni,” tiin a sawi a ni.