Rorelna pakhat hnuaiah…

Khawvel hmun hrang hranga awm Zofate rorelna pakhat hnuaia awm theih kan duh a, kan thlahlel a, chumi atan chuan hma pawh kan la mek a.
Ram hrang hranga awm darh kan nih avangin ‘ramin ri a nei, hnam erawhin ri a nei lo’ tih changchawia mahni awmna ram theuha khua leh tui tha tak ni chunga thinlung hmun khat pua awm tura kan infuih mek lai leh, ‘UN Declaration on the Rights of Indigenous Peoples’-in tualchhuak hnamte mahnia ro inrel ve theihna chanvo a pek behchhana hmalakna kalpui tum a nih mek laiin, kan thenawm ram Myanmar leh Bangladesh bakah, keimahni ram chhung state ngei atangte pawhin hlauhlawpin ‘Zofate Jerusalem’ Mizoram an rawn pan chawn chawn hlawm a. Hetianga harsatna leh chhiatna rapthlak tak tawk chunga Zofate an lo tlanchhia hi, tu te pawhin kan lainatin, kan khawngaih vek ngei ang. Hetiang thil hi thleng se kan ti lo a, mahse a lo thlen tho takah chuan, ‘keinin vanduainaa kan ruat hi a lehlamah kan thatna tur’ te pawh a lo ni zawk thei a. Rorelna pakhat hnuaia kun tura ram hrang hranga awm Zofaten an luah chin ram sat thla tel zawng khera hmalak ngai lo turin remruatna te pawh a lo awm a ni zawk thei a; Remruatu remruatna te pawh a lo ni daih thei bawk. A nihna takah chuan rorelna pakhat hnuaia kun turin rorelna awmsa pakhat hnuaiah kan lut khawm mek chu a ni ber.
India ram state hrang hrang han thlir hian, population density-ah Mizoram hi a hniam ber pawl kan ni a. Kan thenawm state Tripura-ah chuan sqkm khat bial chhungah mihring 350 vel an awm laiin, Mizoramah chuan 52 chauh kan la ni a. Mihring hi kan pung tur a ni tia chithlah punna lam hawia kohhrante meuh pawhin hma an lak mek lai hian, kan chhehvel Zofate an lo lutkhawm tak tak pawh hi, a raltlan ang zawng ringawta lo dawngsawng lo hian, Mizoram population density tichhah tur zawnga kan lo dawnsawn thiamte pawh hi advantage-a kan lo lak thiam a tha dawn lo’m ni le?