Kan ram humhim turin kan sawrkar ngei a ngai – Congress president

Kan ram, kan hnam leh kan sakhaw humhim turin Mizoram mipuiin BJP thawhpui ngai lo tur Congress party kan thlantlin a ngai tih Congress president Lalsawta chuan a sawi.
India ram a zalen atanga vawiin thlenga BJP vanga hun khirh leh thim kan hmachhawn hun a la awm ngai lo tih Congress president hian sawiin, BJP-in sakhaw tih bik neiin sakhaw dang vuantute min nek chep chho zel a. Sakhaw zalenna avangin harsatna lutuk tawk loa missionary-te an awm hnuin, an chep ta hle tih sawiin, BJP-in sawrkarna a chan leh chuan India ram chu chhe darh vek thei dinhmunah a awm mek tih a sawi.
BJP sawrkar hmalakna chu India ram tan a hlauhawm tih hria in, party 26 intelkhawmin I-N-D-I-A (Alliance) an din tih Lalsawta hian a sawi a. Party intelkhawmte hian central-ah sawrkarna an chan ngei a ring tih sawiin, Mizoramah Congress party-in sawrkarna a chan chuan MP an thawh ve thei dawn tih a sawi. “Sakhaw zalenna kan neih zui zel theih nan leh dan hlauhawm sut vek thei turin Congress party hi India ramah a sawrkar a ngai. ZPM chuan Congress party angin I-N-D-I-A hi a thawhpui thei lo a, BJP erawh MNF ang bawkin inthlahrung tak leh Mizoram mipui mitmei veng chungin a thawhpui thei mahna,” a ti.
Sawrkarna an chan chuan state tam takin tih an tum mek ang bawkin Old Pension Scheme-a let leh an tum tih MPCC president hian a sawi a. Old Pension Scheme chuan that tawk lohna leh sawrkar sum a heh tih hre chungin, sawrkar hnathawkte an duhsak avangin a tul chuan Mizoram Pension Rules pawh siamthat an inhuam tih a sawi bawk.
Zawhna chhangin, sawrkarna an chan chuan restricted tender a hmanna dik takah chauh an hmang dawn tih a sawi a. “A hmanna tur bik ngawih ngawih a awm thin a, chu’ngah chuan dik taka an hman chuan a tangkai hle thin. A hmu tur hre lawksaa restricted tender ang chi chu nuai bo ngei kan tum,” a ti.