Kan taimak leh tumruhna in hna awm sa a thleng phak lo – Chief minister

Kan taimak leh tumruhna in
hna awm sa a thleng phak lo
– Chief minister
State pawnah schedule tribe quota in hna a tam a, kan taimak leh tumruhna in min hruai thlen phak loh avangin kan hnawh khat zo ngai lo tih chief minister Lalduhoma chuan a sawi.
Serchhip Govt. College-in an campus-a 4th Winter cum Cultural Fest an huaihawt chu Serchhip bialtu MLA ni bawk Lalduhoma hian Nilaini khan a hawng a. Tunhnaiah zirlai zingah hun a hmang zauh zauh a. Taimak leh tumruh a tul zia a hrilh tam ber tih a sawi.
“Kumin May khan Mizoram chu fully literate state-ah kan inpuang a, India rama a hmasa ber kan ni. Amaherawh chu, India ram huap inelna hrang hrangah hnamdang kan pha lo hle. A chhan ber chu, national exam-ah kan tribal-puite kan tluk loh vang a ni. Hna hi chu a awm a, ST quota pawh kan hnawh khat zo ngai meuh lo. Kan taimakna leh tumruhna hian min hruai thleng phak thin lo zawk a ni,” a ti.
Sawrkarin mi taima leh thawkrimte tana hmasawn theihna kawng zau taka an sial lai hian, thalaite zawk hi an lo inbuatsaih loang tih an hlau tih a sawi.
India rama college endiktu National Assessment & Accreditation Council chuan college tha an tehna pakhatah vantlang tana luanchhuahna a hmang tel a. Serchhip College chu NAAC Grade ‘A’ kawl mektu niin, grade sang zawk hmu tura tan lak zel a tul avangin vantlang tana Festival changtlung tak neih chu tha a tih thu chief minister hian a sawi a. Community activity a nih bakah Fest atanga sum hmuh chu college-a club hrang hrangin activity neihna atan an hman leh dawn avangin, kawng hnihin an hlawkpui dawn tih a sawi a ni.
He Fest atan hian budget cheng nuai 5.6 an siam a, bialtu MLA, chief minister ni bawk hian engemawzatin a pui. Winter Fest hmasa ber atang tawhin kumtin a la pui ziah avangin an lawm hle tih College hotute chuan an sawi.