Kan tang-ulh lutuk em?

Dampa bial by-election campaign a kal mek a, party hrang hrang candidate ten thahnemngai takin bial mipui rilru hneh tumin tan an la sauh sauh reng a. Chutih rualin, party hruaitute pawhin an candidate-te an campaign-pui a, thahnem an ngai hle.
By-election-a tlin ngei tuma thahnemngai taka tanlak hi candidate-te leh an awmna party-te tih ngei ngei tur a ni; chutih rual erawh chuan, thahnem ngaih luat ah, kan tang-ulh lutuk ang a, state mipuite inpumkhatna tiderthawng thei zawng leh, nakin hnu thlenga sernung ni thei tur hi kan hnutchhiah palh ang tih a hlauhawm hle bawk.
Tun hnaia Marpara North-a election campaign-naah ZPM leader Pu Lalduhoma chuan “Hruaitu hmasaten Mizo mipuite leh Chakma inkarah inhuatna chi an lo tuh..” tiin, “Chakma huat dan min lo zirtir tawh thin…” tiin a sawi a.
Hetiang zawnga kan ram hruaitu lu ber a tawng chhuak ta mai hi, a tang-ulh ta lutuk deuh a ni lo maw? a tih theih awm e.
Kan hriat angin, British awpna hnuaia kan la kun hma, kan pi leh pute hun lai khan, tuna Mizoram lo ni ta chhungah hian Chakmate hi an la awm lova, British-in min awp hnuah Bangladesh atanga puakphur mi tlemte lo lutin a hnu zelah zawi zawiin an lo pung hret hret a. A tawi zawngin, India a indan hnuah, Assam sawrkar hnuaia kan la beh laiin, thuneitu mi thenkhatin engtin tin emaw ni Chakma autonomous district council hi an rawn siam ta mai niin mithiam thenkhatin CADC lo pianchhuah dan an ziak atangin hmuh tur a awm a.
CADC hi, Mizoram mipuite hriatpui lo leh, dan tlawhchhan pawh awm mumal lova official tute emawin phuahchawp deuhva an lo siam nia sawi a nih avangin, MNF pawhin ‘CADC thiah’ an aupui thin a. Chutih rual erawh chuan, CADC huam chhunga dan anga Mizoram khua leh tui nihna nei tawh ‘Chakmate huat dan’ erawh hi chu, engtin chiah nge hruaitu hmasate hian an lo zirtir thin tih hi mipui nawlpui chuan kan zuk hre ve kilh kelh kher awm lo ve.
Hetih rual hian, thenawm ram Bangladesh atanga a ruka Mizoram lo luh tum Chakmate lo dang tura inzirtir erawh, dan kalh a nih avangin, kan tihtur a ni zawk. State dang atanga hnam dang ILP nei lo Mizoram lo luh ruk tum kan dang thin ang tho hi a ni mai awm e; an danglamna chu pakhat foreigner, pakhat Indian citizen.
ILP nei lo Mizorama awmte hi, dan kalh a nih avangin, an awm kan phal lova, kan dap chhuak a, kan thawn haw zel a ni hi. ILP nei Mizorama awm mekte hi huat kan inzirtir lova, Mizoram Chakmate hi huat kan lo inzirtir thin tihna em ni dawn le?