HLA KUNGPUI MUAL A VUL ZEL DAWN
B. Lalthangliana
Kum 1986-a din “Mizo Hla Kungpui Mual, Khawbung hi kum sawm danah tih changtlun zel a ni a. Thawh 5-na neih tawh a ni a, tunah hian Hla phuah thiam 21 leh ziak mi 15 lai seng luh tawh a ni.
Hetianga seng luh dawn hian Mizo hnahthlak pumpui huapin, Kawlram te, Manipur te leh Tripura te ngaihtuahna hian a huam vek a. An kutchhuak tam leh tlem lam aiin a that leh that loh (quality) hmanga uluk taka zir chianga teh a ni a. Chipui nihna te, khawchhuak nihna te, thian nihna te leh hmelhriat nihnate hian a hmun a chang ngai lo.
A buatsaihtute beisei ai daihin tlawhtute an tam a, MZU te, College hrang hrangte, High School leh Middle School khaw hrang hranga zirlaiten an tlawh dul dul thin a. Kum 2013-a Central YMA Conference, Khawbunga nghah tum phei chuan tlawhtu an tam em em a, hruaitute chuan pandala inkhawmpui neih chhung chu Mizo Hla Kungpui Mual tlawh lo turin an inkhap hial a ni awm e. Thenkhat phei chuan, “Mizo Hla Kungpui Mual chu, kei ka tlawh duh tawh lo, mi an tam lutuk a, thl^ pawh a lak theih si lo!” an ti hial e an ti!
Tunah hian thawh 6-na, kum 2026-ah nei tura hmalak mek a ni a. Khawbung khawchhuak hmun hrang hranga chengte in chah khawmin “Khawnbung Haw Runpui” nei nghal tura ruahman mek a ni a, chhungkaw inhmuh khawm nan a remchangin a hlimawm tak meuh mai.
Thawh 6-na 2026 April thlaah hian seng luh thar turte thlan fel a nih hmâ hian, Selection Committee chuan mipui hnenah seng luh tur rawt turin mipui hnenah zau takin sawmna an siam phawt a. Tichuan mi 25 lai an chhawp chhuak phawt a, Chuta tang chuan thlifimin mi 10 an thlang chhuak leh a. An sulhnute an zir chiang turin Secretary chu mawhphurhna pek a ni leh rih a.
Taima taka Secretary-in an hnuhmate a zir chuan chu Committee-ah phah a ni a. Ngun taka zir chian leh sawiho a nih hnuin, hengte hi kum 2026-a seng luh tura thlan an chhawpchhuah an ni a.
Hla Phuah Thiam
1. Hrawva (1893-1956)
2. Lalmama (1901-1959)
Ziak Mite
1. Capt. L.Z. Sailo (1924-2008)
2. Rev. Zairema (1917-2008)
3. Kawlkungi (1937-2015)
4. Lalhmingliana Saiawi
(1937-2016)
Hengte hi Hla Kungpui Mual Committee pui Khawbung hnenah thlen an ni a. Anniho pawhin ngam taka an sawiho hnuin thu tawp siamin an pawm thlap ta a ni.
Heng thlan chhuahte hi zir chiang a, Paper tha tak ziak turin mithiam ruat an ni a. Hla kungpui Thawh 6-na lungphun hawn hm^ ni pui ni, kum 2026 April thla bul lamah, Khawbungah Seminar hi neih tum a ni a, chung Paper-te chu a bua chhuah tum a ni nghe nghe.
He hun pawimawh leh hlimawmah hian seng luh tawh leh seng luh thar chhungte chu sawm vela tam a ni a. Hmun hrang hranga cheng Khawbung khawchhuakte leh hetiang lama tui leh ngaihlu a thei apiang tel tura sawm in ni e.