SIALSUK BUS ACCIDENT LEH MACT

On Nov 4, 2025 10 0

Prof. JV Hluna, Ex-MLA
Kum 1983 February thla khan M.Phil Special Course for College Teachers NEHU hnuaia College hrang hrangte NEHU Hqrs Shillong-ah min zirtir a. Ka thian duh tak Pu John Lalngilneia, IRS chuan hetia NEHU-a M.Phil Course Work kan neih lai hian zan khat chu Fruit Garden-a a in luahah chaw eiin min sawm a. Prof Lalthantluanga leh Pu Tlanglawma te an tel bawk a. (Hetih lai hian Pu Tlanglawma hi a la Professor lo). A in luah neitupa Khasi ukil Jarina pawh a awm bawk a. Pu Jarin-a nen chuan kan inkawm fuh hle a. Mizoramah chuan motor accident a awmin Insurance Company Silchar-ah engkim tih a ngai a. An endik dawnin hruai an ngai a, hmu tak tak tur chuan anmahni eng emawzat pek an ngai bawk a. Insurance claim hi hlawhtling an awm pawh ka hre lo; a buangbar thlakin claim duh leh bawhzui duh pawh an awm meuhin ka hre lo tih thute ka sawi a. Mizoram State Transport Bus, Aizawl – Sialsuk Service accident thu leh mi 10 aia tamin nunna an chan thute ka hrilh a. Ani chuan, “Thi pawh, hliam pawh, pawisa hmu turin a claim theih vek a lawm, chutia ngawih bopui mai mai tur a ni lo”, a ti a. Kan sawi tui ta zel a, kan inbiak zuinaah a claim form te min pe a, “Police verification leh Medical Certificate dik tak nen i rawn ken phawt chuan tam tak an chhungten an hmu thei a ni” a ti a.
Sialsuk Accident Chhungte leh SCAP-Shillong MACT-ah M.Phil Course work kan zawh chuan phur em emin Motor Accident Claim Form chu ka hawn a. Ka naute, Students’ Conference for Action Programme (SCAP) zirlai pawlte nen chuan kan bawhzui ta a. Sialsukah zinin MST Bus accident a thi hming, Police verification leh Medical certificate chu kan la vek a, thi chhungte chu chet vel nan Rs 100/- theuh kan thawhtir bawk a. A claim form chu ngun taka fill-up in Police Verification leh Doctor report leh a Bus number nen chuan Shillong ka zinthla leh ta a. Kan Ukil hnenah chuan ka pe vek a, pawisa kan khawn khawm ang ang pawh chu ka pe a. Hetiangin :-

MST Bus No. ZRX 84
Name of Driver : B. Lalchunga
S/o Ngunsuia, Thingsai
Present Address : Mission Vengthlang, Aizawl
Date of Accident : 27-5-1983
Place of Accident : Near Sateek, 40kms from Aizawl on Aizawl-Sialsuk road

The following persons died in this accident:-
1. Siamhmingthanga, 49 years,
s/o Darkhuma, Khatla, Aizawl.
2. Vanlalhriata, 26 years,
s/o B. Lalchunga (Bus Driver),
Mission Vengthlang, Aizawl.
3. Lallianthangi, 23 years w/o
Biakchhunga, Saron Veng, Aizawl.
4. Lalchungnunga, 28 years
s/o Lalnghina (L), Kawnpui
5. Rualkhuma, 71 years s/o Chawngsabuta (L), Dinthar, Aizawl.
6. Chhuanthangpuia, 43 years s/o Hrangzuala, Saron Veng, Aizawl.
7. Lalthuami, 45 years d/o Chaltuah khuma, Bethlehem Veng, Aizawl.
8. Sanglura, 42 years s/o
Thangbawnga, Chanmari, Aizawl.
9. |huamluaia, 45 years
s/o Hrangmanliana, Sialsuk.
10. Laihnuna, 47 years
s/o Chhunsanga, Sialsuk
11. Nghakmawii, 20 years
d/o Zoduha, Sialsuk
12. Vanlalbuka, 50 years
s/o Thangbuaia (L), Sialsuk
13. Nunpuii, 48 years w/o
Kawlluta, Mission Vengthlang, Aizawl
14. Manliana, 40 years s/o
Paltresura, Shermantilla, Aizawl.
Hliam tuarte pawhin an hliam nat dan ang zelin a enkawlna a claim theih a tih bawk avangin hliam hming leh an hliam dan chu kan theih ang angin kan la khawma, kan khinna ah chuan mi 27 lai an hming kan telh ve nghal bawk a. Hetiangin :-
1. Tlangkhuma, 42yrs, S/o
Hnawnga (L), Zotlang, Vaivakawn
2. Biakzama, 26yrs, s/o Lalrosiama, Samlukhai
3. Biakhnuni, 21yrs, d/o Selvunga,
Sialsuk
4. Vanlalpeki, 25yrs,
c/o Zaneihtluanga, Republic Veng
5. Malsawma, 20yrs, s/o Lalluta, Sialsuk
6. B. Lalchunga, 35yrs, s/o Ngursaia, Mission Vengthlang (Bus Driver)
7. Lalnunsanga, 3yrs, s/o
B. Lalchunga, Mission Vengthlang
8. Lalrinchhana, 6yrs, s/o
B. Lalchunga, Mission Vengthlang
9. Thansangi, 11yrs,
d/o Lalthianghlima, Sialsuk
10. Lalhranga, 19yrs,
s/o Saizama, Venghlui, Aizawl
11. Vanlalsanga, 20yrs, s/o
Hmingliana, Republic Veng Aizawl
12. K. Khawnghinga, 48yrs,
s/o Bawihtlaia, Champhai
13. Darthantluanga, 29yrs,
s/o Lianhlira, Maubawk, Aizawl
14. Lalramliana, 22yrs, s/o
Zodailova, Thakthing Dam Veng, Aizawl
15. Thanghliri, 15yrs, d/o Darrivunga, Mission Vengthlang, Aizawl
16. Biakthansangi, 32yrs, d/o
Laithanthuama, Kawnpui
17. Vanlalruata, 4yrs, s/o
Laithanthuama, Kawnpui
18. Lalrinawmi, 28yrs, d/o
H. Thangkima, Chhinga Veng, Aizawl
19. C. Lalmawii, 40yrs, w/o
C. Lalmawia, Bungkawn
20. Vanhnuaichhingi, 38 yrs,
d/o Lalhuthanga, Armed Veng, Aizawl
21. Thlengliani, 29yrs,
d/o Zorammawia, Sialsuk
22. P.C. Lalnunkima, 22 yrs,
s/o Zoduha, Sialsuk
23. Chaldailovi, 19yrs,
d/o Vanthanga, Samlukhai
24. Biaknungi, 24yrs,
d/o Hrangliana, Sialsuk
25. K. Vanlalchhuanga, 40 yrs,
s/o Biakvela, Mission Vengthlang
26. Lianthangi, 38yrs,
w/o Biakvela, Mission Vengthlang
27. Lawmzuali, 18yrs,
d/o Lalthanga Sialsuk

He MST Bus ZRX-84 hi May 27, 1983-a Aizawl atanga Sialsuk pana a kal Changte lui hnai, Sialsuk thlen hma km 40-a accident a ni a. Kawngpui atangin zinglam, 11:30am ah a tlan liam a, metre 110 lai lum a ni a. Hetiang khawp accident rapthlak hi kan ramah a la thlen loh em avangin mi tin rilru a dek a, pawi kan tiin rapthlak kan ti vek a ni. Police investigation report-ah pawh Driver B. Lalchunga hian a khalh fimkhur lova, a chak lutuk bawk avanga accident hi thleng a ni tiin Aizawl Police Station-ah case rip tak U/S 279/304 (A), 337/427 IPC an awrhtir a ni.
Shillong MACT-ah kan Case a tla
Shillong MACT-a kan Ukil-in case a han thehluh chuan kan hlim em em mai a. Mizorama la thleng ngai lo, accident-a thi chhungten zangnadawmna an han hmu nghek mai ang a, hliamten anmahni enkawlna tur zangnadawmna an han hmu bawk tur chu kan nghakhlel hle mai. Amaherawhchu kan beisei ang a ni ta reng reng lo mai a. Shillong MACT-ah chuan kan case chu a tla ta der mai a. Kan bei a dawng hle.
Kan ukil Pu Jarin-a chu ka pan leh ngat a, a chhan te dilchhut takin ka zawt a- “I form min pek angin kan fill up vek a, Police Verification leh Medical Certificate te buaithlak takin kan la khawm a, i sawi ang tih loh kan nei si lova, kan lo beisei ang leh thi chhungte hnena kan sawi ang a va ni lo em em ve. Ka tan phei chuan zahthlak tak a ni. An chhungte pawh ka hmu ngam dawn em ni? Ka naute, zirlai SCAP naupangho hnenah pawh engtin nge ka hrilhfiah tak ang” tiin ka vui deuh thu leh mak ka tih thu ka hrilh a. Min bum ni tein ka ring deuh rum rum a. Ani chuan engkim min hrilhfiah a. “A pawi khawp mai, ka hriat bak thil a ni. In document leh kan khinnaah dik lo engmah a awm lo. Mahse thil ho te – Mizoram chu state hran a nih avangin Shillong MACT Jurisdiction-in a huam pha lo – tih a ni a, ngaihtuah theih a ni ta lo a ni” a ti ta mai a.
Memorandum ka Thehlut
Kan sawi dun zel a, Mizoramin MACT hran kan neih a ngai, kan neih loh chuan hetiang hi ngaihtuahtu tur Court kan nei lo tihna a ni. Chuvangin kan neih ve theih nan bul kan tan a ngai a ni ka ti a. Memorandum min ziaksak la, Chief Minister hnenah leh kan Lt. Governor hnenah MACT kan neih ve theih nan theihtawpin hma kan la ang a, kan han nawr zui ang e ka ti a. Tawi fel thlep thlawpin Memorandum min ziahsak a. Hetah Aizawlah type thain Lt. Governor hnenah ka hmingin kan thehlut ta a. A copy hi Chief Minister hnenah leh Pu C. Thangmura, President, PUCL (People’s Union for Civil Liberties) hnenah te kan pe bawk a. Pu Thangmura phei chu lenchilhin a beih zui dan tur thlengin kan sawi dun a, kan bei zui ta reng a.
Law Secretary P. Chakraborty-a’n kawng a zawng
Kan Law Secretary Pu P. Chakraborty kha mi vengva tak a ni a. Pu Thangmura nen chuan amah kan dawr zui ta zel a. Anin State dangte dawr kualin a zir a zir a. Kum 1988 April ni 14-ah chuan The Draft Mizoram Motor Accident Claims Tribunal Rules, 1988 Notification a tichhuak ta a. No STV 16/80, the 14th April 1988-a Notification chhuakah chuan he draft rules hi Gazette-a a chhuah atanga thla khat (ni sawmthum) chhungin mi tupawhin sawiselna emaw, rawtna emaw an thlen thei ang a; rawtna leh sawiselna te chu ni 30 hnuah en a, a tul anga he Draft Rules hi final a ni ang tih a ni a. Mizoram Gazette Vol. XVII, Extraordinary Issue No. 50 date 14-4-1998 pages 1-5 ah chhuah a ni a. He Draft Rules hi Pu Vanhela Pachuau, Secretary to the Government of Mizoram, Transport Department hminga chhuah a ni.
MACT kan nei ve ta
Rawtna leh sawiselna awm ang ang enfiah a nih hnuah No. STV 16/80, the 18th July, 1988 angin The MIZORAM MOTOR ACCIDENT CLAIMS TRIBUNAL RULES, 1988 Notification chu a lo chhuak ta a. Mizoram Gazette, Vol. XVII, Extraordinary Issue no.84, dated 18/7/1988 pages 1-6 a chhuah a ni a. Mizoramin MACT kan nei ta.
Kum 1983 atanga a mik a mak hre mang lova kan lo arkhawthimdai bawrh bawrh chu a tak ram kan thleng a, kan state ngeiah kan hmu ve ta a, kan va lawm em! Pu P. Chakraborty chu Tribunal Presiding Officer hmasa berah a tang zui ta nghe nghe a ni. Accident claims chungchang a ngaihtuah lai hian lengah min sawm thin a. An beisei phak loh, an chhungte thi tawh hminga, compensation cheng tam tak tak award siam chu lungchhe taka tap zawih zawih te pawh mi eng emaw zat ka hmu a, vanduai a chunga compensation an hmu thei hi a lawmawm em em a ni.
Sialsuk accident kan tih te pawhin tlai deuh mahse MACT kan neih veleh Shillong MACT-a kan lo claim tawh angin a tharin claim submit a ni a. An vaiin an claim ta em chu ka hre lo va. Zangnadawmna an hmu hlawm nual a ni tih ka hria a, a lawmawm hle a ni.
Motor te hi Insurance Company-ah insure ngei ngei tur a ni a. Accident tawh palhah MACT in Award a siam ang ang chawi tura an intiamna a ni. Sorkar Motor te Insurance Company-a an insure loh chhan chu anmahni Sorkar Department kha Insurance Company aiah a ding ve thung a ni. Workmen’s Compensation Act pawh hi MACT Tribunal-ah ngaihtuah a ni thin.